MÆJA

2011-10-30T18:02:00.003Z

Það er nú ekki einleikið hvað ég hef verið löt að blogga upp á síðkastið... kannski bæti ég úr því á næstunni, lofa þó engu.
Orð dagsins:
Des dess HK
Þýðir: ilmefni, angan
Dæmi: Stúlkurnar úðuðu á sig desi því þær nenntu ekki í bað.

Farsótt

2011-02-05T11:42:00.005Z

Þar sem það virðist vera að ganga að blogga, þá get ég alls ekki sleppt því.

Ég var að velta fyrir mér um daginn, er til stofnun sem ekki er leiðinleg? Ég hef hugsað þetta fram og til baka og man hreinlega ekki eftir neinni stofnun sem ekki getur talist leiðinleg. Matvælastofnun, Skipulagsstofnun, Árnastofnun, Námsgagnastofnun.... Magnað.

Jájá og seisei... Það er nú ekki frá mörgu að segja, lífið gengur sinn vana gang sem er á þessum árstíma hálfgerður hægagangur. Lítið um að vera og fátt sem ber til tíðinda. Reyndar er ég nú eins og ýmsir aðrir búin að taka hross á hús og stytta þau mér stundir milli mála. Ég get að vísu ekki boðið fákum mínum upp á jafn glæsileg og nýsmíðuð húsakynni og þær systur í Víðidalstungu en það verður bara að hafa það.

Aldrei slíku vant er snjór. Þetta er nú eiginlega fyrsti snjórinn sem ég sé í vetur í einhverju magni. Hingað til hefur þykkt snjóalaga hlaupið á nokkrum sentimetrum en nú er snjórinn líklega svona 30 cm djúpur - sem sagt; fimbulvetur og harðindi. Ég veit ekki alveg hvernig ég tekst á við þetta ástand, maður er orðinn svo góðu vanur. Auðvitað er best að sitja inni og bíða vors en þar sem það er ekki von á vori alveg á næstunni er líklegt að það gangi illa upp - svona varðandi vinnu og þannig. Líklegast verð ég bara að setja í ,,hörkutólagírinn" og láta mig hafa þetta.

Ég var að lesa bók um daginn sem er svo sem ekki í frásögu færandi nema fyrir þær sakir að mér fannst hún frekar leiðinleg - eða svona pirrandi. Það er sjaldgæft að ég nenni að lesa leiðinlegar bækur frá upphafi til enda en ég lét mig hafa það núna. Ástæðan fyrir því að ég gafst ekki upp var sú að ég trúði því allt til loka bókarinnar að hún ætti eftir að skána. En það gerðist ekki. Bókin þótti mér pirrandi vegna þess að mér fannst aðalpersónan leiðinleg, frek og sjálfselsk kerlingarbeygla. Ég sem sagt trúði því að kerlingaráklan myndi láta af þessum löstum einhverntíman undir lok bókarinnar og sagan þannig fá farsælan endi. En ekki fór það svo, endirinn undirstrikaði raunar bara hversu óborganlega óþolandi leiðinleg aðalpersónan var - að mínu mati allavega. Þetta fékk mig svo til að hugsa hvort það hafi verið tilgangur höfundar að hafa persónuna svona leiðinlega eða hvort að höfundinum þyki ekkert athugavert við að fólk sé eins og þessi aðalpersóna... Vonandi var það vísvitandi gert að hafa persónuna leiðinlega. Fyrir forvitna var þetta bókin Tryggðarpantur eftir Auði Jónsdóttur.

Þegar ég hugsa út í þetta er þetta náttúrulega aðal plottið í bókinni - að hafa kerlinguna leiðinlega út í gegn og þá í rauninni það sem gerir bókina frekar góða - þó maður fatti það ekki fyrr en maður er búinn að hafa það af að lesa hana alla... Magnað

Jæja gott í bili.

Orð dagsins: fannaket
Orðið þýðir: kjöt af sauðfé sem hefur fennt eða króknað
Dæmi: Boðið var upp á fannaket af villfé á þorrablótinu

Aðventan alveg að detta inn

2010-11-27T21:25:00.007Z

Gott kvöld
Það er ógurlega langt síðan ég skrifaði hér inn síðast. Ég gæti eflaust sagt frá allskyns sem hefur komið fyrir mig síðan síðast - t.a.m. öllum þeim spennandi verkefnum sem ég vann í sumar eða kynnum mínum af kúm núna í haust. Ég er samt að hugsa um að sleppa þessu öllu og segja frekar frá högum mínum. Ég er svo sem ekki viss um að það langi nokkrun mann sérstaklega að vita þetta en mér er nokk sama.

Sem sagt. Ég bý í Reykholti í Biskupstungum með ástmanni mínum, honum Mads. Við búum í ekkert voða gömlu parhúsi sem er frekar ljótt og hefði mátt vanda betur (ekki járn á þaki heldur tjörupappi, ómáluð timburklæðning, illa flísalagt og fleira skemmtilegt). EN þægileg leiga og staður að búa á.

Mads - kynþokkafullur að vanda

Inngangur híbýla okkar í Kistuholti 4

Bæði vinnum við hjúin á sveitabæjum við að mjólka kýr og fleira. Mads vinnur í Bræðratungu, stórbýlinu sem kemur við sögu í Íslandsklukkunni. Þess má geta að húsbóndinn þar í dag er ekki eins drykkfelldur og Magnús bóndi í sögunni. Eins og dönskum fjósameistara sæmir vinnur hann með flókna tækni, mjaltaróbót af DeLaval-gerð og kýrnar eru rúmlega 70. Einnig eru hross og sauðfé á bænum en Mads sinnir þeim peningi minna.
Ég vinn í Gýgjarhólskoti sem hvergi hefur komið við sögu í bók svo ég viti. Þar er mjaltabás og rúmlega 40 kýr og svona 350 kindur. Þessa dagana er litlu öðru að sinna en fjósverkum og heygjöf sauðfjár (sem afi sinnir alfarið). Þar sem ég nenni ekki að vakna ógeðslega snemma (morgunmjaltir) til að keyra í vinnuna þá er ég þar dag og nótt virka daga en fer heim um helgar.

Delaval majaltaróbot eitthvað líkur þeim sem Mads vinnur með

SAC mjaltakross - svipaður og ég nota

Um helgar gerum við fátt, Mads fer að vísu alltaf aðeins í vinnuna til að sinna kúnum en er heima mestan part dagsins. Stundum er þó eitthvað sem þarf að gera heima í Arnarholti eða einhver sem þarf að heimsækja eins og gengur.

Þar sem við höfum bæði áhuga á búskap eigum við dálítið af búfé. Mads á heilmarga fugla af nokkrum sortum og fáeinar feldkanínur sem hann heldur í Bræðratungu. Hann á hænur, íslenskar og nokkrar aðrar sortir, endur, gæsir og dverghænur. Hann langar í grís en veturinn er ekki besti tíminn til að vera með smágrís. Við eigum nokkra hesta eða ég á 4, Mads á einn. Svo eru einar 5 kindur í okkar nafni í Arnarholti. Ekki má gleyma Krumma, aðal félaga Mads, sem er hundur af Boxertegund.Íslenskar hænur, að vísu gömul mynd þessi hani (Dóri) er t.d. dauður

Endurnar Silja og Doddi

Kanínur, veit ekki hverjar þeirra þetta eru - sennilega Helga og Mæja

Freyja hans Mads

Spesía Sparisjóðsdóttir, fædd 2010

Gandur frá Gullberastöðum, verður vonandi taminn eftir áramót

Eyrarrós með Glitrós - kindur frá mér. Allar mínar kindur - 3- eru golsóttar

Lurka hans Mads með öðru lamba sinna undan Skrauta

Krummi sigraður af svefninum

Eflaust gæti ég sagt fleira, t.d. hvað við erum yfirleitt með í matinn og svona en því nenni ég ekki. Læt þetta duga í bili.

Orð dagsins; tussi
Orðið þýðir; smápoki eða tuddakálfur.
Dæmi; varningurinn kom í tussa úr plasti. Á dögunum bar 318 tussa.

Grasið grænkar, gleði eykst

2010-05-04T09:28:00.006Z

Góðan dag og gleðilegt sumar

Ég hef nú verið heldur löt að skrifa hér undanfarið enda búin að hafa nóg annað að gera - aldrei þessu vant. Vinnan (gagnavinnsluverkefni eitt lítið) hefur tekið nokkuð af tímanum, hrossin tvö nokkra tíma en flutningar og vesen þeim tengt gífurlega mikinn tíma. Alltaf skal ég gleyma því milli þess sem ég flyt hvað það er óskaplega mikið vesen. Pakka niður þeim ósköpum af drasli sem maður sankar að sér á fáránlega skömmum tíma, flytja öll ósköpin landshorna á milli með tilheyrandi kostnaði og veseni, þrífa eftir sig og þá er eftir að koma öllu helvítis ruslinu fyrir á nýja staðnum. Þetta er nú reyndar að hafast hjá okkur, lítið eftir á Hvanneyri nema búskapurinn - hænur og hross.

Kjúklingar Hr. Jörgensen

Já talandi um hross þá eignaðist ég nýtt þannig á dögunum. Mads bauðst að kaupa um það bil 10. vetra meri af félaga sínum sr. Flóka sem hann gerði og gaf mér í tilefni afmælis míns. Merina sótti ég um daginn suður í Land hérna á Hvanneyri þar sem hún hefur greinilega átt góða daga - hún er allavega fullkomlega samkeppnishæf við merarbollurnar heima í Arnarholti hvað varðar spik á síðu og lend. Tamningatryppið hún Ljóta-Blesa er öll að koma til. Alveg hætt að prjóna af stað og kemur sér þokkalega áfram þó ekki sé hún sérlega viljug. Setefnan er sett á að skila henni til eiganda síns í dag eða á morgun.

Mads fór að vitja ættingja sinna í veldi Möggu drottingar í síðustu viku en kom heim í fyrra dag. Það var allt hið besta mál nema hvað fólk var alltaf eitthvað að þvarga í mér hvaða erindi hann hefði haft í ferðinni - en það gat ég ómögulega munað. Ég var því sökuð um sinnuleysi gagnvart ástmanni mínum og annað í þeim dúr. Það kom svo upp úr kafinu þegar Mads var komin heim aftur að hann hafði bara hreint ekkert erindi út annað en það að heimsækja fólkið svo ekki skrítið að ég myndi ekki hvað hann ætlaði að gera.

Arnarholt séð í gegnum gamlan öxul

Núna sit ég yfir prófi í Gamla-Skóla. Heilir fjórir nemendur þreyta prófið og dugar því ekki minna en að bæði ég og Edda Þorvalds sitjum yfir þeim.

Sauðburður er víða hafinn. Ekki heima að vísu en það fer að líða að því með tilheyrandi nóttum í fjárhúsi og öðrum hressandi sveitastörfum.

Þetta lamb er, held ég alveg örugglega, núna gemlingur

Orð dagsins; júfferta
orðið þýðir; trjábolur eða gildur viðardrumbur. Gildvaxinn fyrirferðarmikill kvenmaður.
Dæmi; Júffertur báru uppi þakið. Þórunn Edda er nú engin júfferta.

Án titils

2010-04-03T20:19:00.012Z

Gott kvöld góðir lesendur

Ég hef ákveðið að rita hér nokkur orð í tilefni þess að ýmislegt hefur skemmtilegt gerst og Mads er að horfa á Barnaby.

Tamningar eru í fullum gangi, Blesa - eða Ljóta-Blesa eins og eigandi hennar hefur yfirleitt kallað hana - er hress og var til að mynda sérstaklega þæg í dag. Pjakkur gamli er allur að koma til en það mátti svo sannarlega því hann var latari en unglingur við uppvask fyrst eftir að hann kom. Annars er það nú helst að frétta úr hestamennskunni að við Pjakkur brugðum okkur með fríðu föruneyti upp í Lundarreykjadal á Páskaleikana 2010. Páskaleikarnir eru frjálslegt en jafnframt háalvarlegt hestamannamót með ýmiskonar sprelli. Föruneyti okkar voru Eygló Óskarsdóttir frá Krossi og hennar frækni reiðskjóti en þær gerðu það einmitt gott á mótinu - unnu titilinn
,,efnilegasti knapinn".

Blesa hressa

Árni á Skarði tók tilþrifamikið stígvélaspark á leikunum

Eygló efnileg í upphafi leika

Mads er alltaf í hænubraskinu sínu - en hann eignaðist tvö hænsn einhverntíman í fyrrahaust. Ég kíkti svo út í hænsnakofa á dögunum og fannst eitthvað vera meira þar af fuglum en ég var vön. Ég innti Mads eftir því hvað það væru eiginlega orðnir margir fuglar þarna inni en það reyndust vera um 40 kvikindi en eru þá ótaldir óklaktir ungar andarinnar Silju.

Talandi um Silju þá heimsóttum við þá Sigurðardóttur um síðustu helgi. Hún og ástmögur hennar Þórður Svavarsson eru á fullu að gera upp gamalt hús á ættaróðali hans - Ölkeldu á Snæfellsnesi. Þegar okkur bar að garði var verið að smíða stiga milli hæða sem þótt sérlega spennandi því ekki hafði verið fært upp á efri hæðina um nokkurt skeið. Við tókum að sjálfsögðu útsýnisferð um alla kofa á bænum, þáðum kaffi og átum köku.

Helga kannaði hvort nýi stiginn væri nægilega traustur

Ég hef annars undanfarna daga verið gripin miklu bakstursæði, sem er í hæsta máta óvanalegt. Eins og ég sagði frá síðast voru gerðar kleinur hér á dögunum en síðan þá hafa bæst í hópinn nokkrir rúgbrauðshleifar og slatti af flatkökum. Þetta er náttúrulega stórgott en þess getur verið langt að bíða að annar eins hamur renni á mig. En kannski er þetta nú ekki alveg yfirstaðið svo mögulega verður slett í kaniltertu fyrir ástmann minn á morgun (þegar hann sá þetta skrifað fékk hann vægt oföndunarkast og meig ofurlítið á sig af spenningi).

Rúgbrauð

Flatkökur

Stoppaðir sokkar - ekki uppáhalds verkið en ágætt þegar það er norðangarri

Núna er það bara páskahátíðin sem er að detta inn. Sökum trúleysis er ég nú ekki spennt fyrir boðskapnum en að sjálfsögðu mjög þakklát fyrir frídagana. Talandi um trú þá fór ég að velta nokkru fyrir mér í dag. Hvar eru þeir sem ekki eru í Þjóðkirkjunni grafnir? Varla í kirkjugarði - það hlýtur að stríða gegn ,,trú" þeirra? Má grafa fólk hvar sem er? - varla, fyrst það má ekki einu sinni grafa dauða rollu, strangt til tekið.... Eru þeir í grafreitum? - grafreitir eru nú ekki á hverju strái. Veit þetta einhver? Ekki ég allavega. Ég fór svona að spá í þessu því ég er nú, eins og áður kom fram, tiltölulega trúlaus og kem líklega til að drepast einhvern tíma.

Orð dagsins; Petti
Orðið þýðir; lítið svæði, eitthvað lítið s.s. bandspotti, stubbur/smástykki af einhverju
Dæmi; Túnin hans Dodda eru engin petti. Mads fékk sér svolítið flatkökupetti með sméri.

Myndir frá Ölkeldu og af páskaleikum á myndasíðu

Það blanda allir landa....

2010-03-26T19:32:00.009Z

Góða kvöldið

Nú hefur aldeilis margt á dagana drifið. Bæði svona almennt og í mínu bráðspenanndi lífi. Ég segi stuttlega frá þessu.

Um síðustu hegi fór ég á heimaslóðir mínar til að aðstoða föður minn við mjaltir og bræður mína við gegningar. Það var alveg hreint ágætt, gerði ýmislegt hressandi eins og að moka skít og járna. Skrapp líka með bræður mína á opin dag á Stóra-Ármóti sem var ágætt.

Hinir eldspræku Magnús B. Jónsson landsráðunautur í nautgriparækt og Guðmundur Jóhannesson ráðunautur á Búnaðarsambandi Suðurlands létu sig sko ekki vanta á Stóra-Ármót

Merin hans Mads hún Freyja sést hér í árásarham

Þegar ég skildi við í síðasta bloggi var ég búin að vera að plana að fá hingað hross. Þau eru komin núna og það er mjög ánægjuleg. Pjakkur er að vísu ekki jafn sáttu við þetta allt, í það minnsta var hann með allra latasta móti í gær þegar ég fór á bak. Meri sótti ég svo í Arnþórsholt í gær og fékk með henni fylgdi spáný klipping og poki af fóðurbæti - ekki amalegt það. Mér sýnist það nú vera ágætisgrey en það á að vísu eftir að koma betur í ljós.

Kláraði svo að kenna staðarnemum í fóðurverkun í síðustu viku og var með próf í áfanganum núna á miðvikudaginn og fór það vel. Skríllinn sá heldur svo í verknám eftir páskana og sjást líklega ekki á Hvanneyri fyrr ein einhvern tíma í júní. Kennslu er þó ekki alveg lokið því það eru 18 stykki fjarnemar sem á eftir að klára að kenna. Besta mál.

En kennslutengt. Fór í dag í ferðaleg með sauðfjárrækt 2 (bændadeild 2) á Strandir að skoða sauðfjárbú. Fórum í heimsók í Húsavík, á Heydalsá og að Smáhömrum. Ég tók að mér að keyra í þessu ferðalagi, aðallega vegna þess að bíllinn minn er stór og rúmgóður og mér þykir gaman að keyra. Ég og mínir hressu ferðafélagar, Rúnar og Geir (+Stefán á norðurleið en Jóhann á suðurleið) ákváðum að fara dálítinn hring og keyra Arnkötludal heim. Það var alveg ágætt nema þegar við vorum rétt komin yfir hæsta punkt var trailer þversum á veginum og þurftum við því að bíða nokkra stund. Þrátt fyrir biðina náðum við á Hvanneyri á undan þeim sem fóru Hrútafjörð og Holtavörðuheiði.

Þessar krúttlegu gimbrar höfðu það notalegt í nýjum fjárhúsum á Heydalsá

Það greip mig svo gífurlegur dugnaður í gær í kjölfar áskorunar frá ástmanni mínum. Ég smellti í kleinur. Af góðmennsku buðum við svo Eygló Óskarsdóttur vínsala og nágranna okkar yfir í kaffi og kleinur og varð úr því hið ágætasta kvöld.

Sjáiði bara hvað ég er dugleg

Látum þetta gott heita í bili.

Orðdagsins; frugg
orðið þýðir; lélegt gras, myglað hey eða éljahreytingur.
Dæmi; Strandarollurnar fengu ekkert frugg. Örlítið frugg var á Arnkötludal.

ps. fleiri myndir á leið á myndasíðuna

Af gærum og gæjum

2010-03-11T19:48:00.002Z

Jæja er ekki tímabært að setja hér inn nýja færslu? Ég held það.

Það hefur svo sem ekkert sérstakt átt sér stað en það er nú allt í lagi. Ég veit reyndar, vegna þessa tíðindaleysis, ekkert hvað ég ætti helst að skrifa... kannski get ég að vísu byrjað á því að greina frá því að um helgina stefnir hópur fólks á að fara í búfjárræktarferð í Skagafjörðinn. Það mun vera sögulegur fjöldi sem er að fara að þessu sinni - rúmlega 70 manns. Dagskráin er svakaleg og eflaust mun skríllinn skemmta sér ljómandi vel. Nú annað nánast jafn spennandi sem er á dagskrá þessarar helgar er það að Mads ætlar að sækja sér fleiri hænur og að því ógleymdu að Skvísa ætlar að fá sér ormahreinsun - íha.

Sit núna fyrir framan sjónvarpið með Helgu mongó að horfa á þá frómu þáttaröð ,,hvernig ég kynntist móður þinni" (Helga segist ekki vera mongó - hún sé bara að klóra sér). Þessi þáttaröð er annars dáldið skemmtileg, tekur fyrir allt þetta klassíska, ást vesen, grín og svona... Nú svo tekur við enn meira af áhugaverðu sjónvarpsefni - Elli Steinn og svo náttúrulega píurnar á Bláregnsslóð.... úff áhugaverða líf.

Annars fór ég að heimsækja strák um dagin. Hann var búinn að ræða það við mig að einhverntíma í haust að ég myndi taka fyrir hann hross og ákvað ég að skreppa og kíkja á gripinn. Strákurinn er hinn margfrægi Dúddi í Holti eða Guðmundur í Arnþórsholti eins og enginn þekkir hann. Truntan leit bærilega út og stendur til að skottast eftir henni einhverntíma við tækifæri. Talandi um truntur þá er ég líka að spekúlera í að fá hingað gamla klárinn minn um þarnæstu helgi, svona til að halda honum og mér svolítið við.

Hér sést Dúddi í heyskap síðastliðið sumar. Myndin er af vef Skessuhorns.

Jæja, tími á orð dagsins

orð dagsins; hábrókast (so.)
orðið þýðir; vera drembinn, monta sig
Dæmi; Dóri hábrókaðist yfir árangri sínum í prófunum.

Snjór

2010-02-26T16:10:00.005Z

Góðan daginn

Þar kom að því - snjórinn kom. Það er að vísu trúlegt að hann fari einhverntíman eftir helgi en samt hann er hér og mikið af honum. Ég er búin að vera í nettu nostalgíukasti úti í snjónunm - búa til snjóhús, troða mér í gegnum skafla og svona. Ef það hefði ekki verið skítarok og eiginlega blindbylur þá hefði ég ábyggilega reynt að leita uppi einhvern hól hérna á Hvanneyri til að renna mér niður.

Það hefur dregið í skafla

Annars er eiginlega ekkert að frétta - það gerist eitthvað svo fátt núna. Skil ekkert í þessu. Venjulega hef ég fundið mig í hringiðu allra helstu viðburða en svo virðist vera að ég sé eitthvað að detta út úr öllu þannig. Kannski er ég að gamlast. Ég ætti þá kannski að tala um gamlafólksleg málefni eins og nýja safnaðarheimilið á Hvanneyri og sögukvöldið sem Bjarni Guðmundsson hélt þar á dögunum... ég er búin að tala um veðrið, það er gamlafólkslegt að tala um það en ég hef að vísu nokkuð sterka tilhneygingu til að tala um veður. Hvað er fleira gamlafólkslegt að tala um.... ? JÁ heilsu sína... ég hef verið all-heilsuhraust undanfarið, hægðirnar verið með besta móti enda verið dugleg að fá mér músli og stunda létta leikfimi. Svo fór ég í svínaflesusprautu niður í Borgarnes á dögunum og bjóst allt eins við að ég yrði slöpp en svo var ekki, þvílíkt lán. Jájá og sei sei.... sennilega er ég að gamlast.

En ég skellti mér á þorrblót á dögunum og að þessu sinni í Lundarreykjadal. Það var ágæt skemmtun, slatti af fólki og þokkalegt stuð. Set inn myndir á myndasíðuna af þessum heimsviðburði.

Óli á Hóli þykist ekki vera neitt glaður yfir þessu...

humm... hvað ætti ég að segja meira.... mér dettur eiginlega ekkert í hug.

best að enda þetta bara á;
Orð dagsins; einhala (kvk)
Orðið þýðir; haft um fjós með eina básaröð eða fjárhús með einn garða við vegg.
Dæmi; Kýrnar stóðu í einhölufjósi. Hagkvæmt gæti verið að hýsa féð í einhölufjárhúsi.

Í tilefni nýhafinnar Góu

2010-02-22T12:32:00.002Z

Hafir þú einhverntíma velt því fyrir þér hvernig það væri að vakna við hlið mér er það eitthvað í líkingu við eftirfarandi mynd;

Það skal þó tekið fram að ég er ekki alltaf svona glaðleg og Helga deilir ekki með mér rúmi að jafnaði.

orð dagsins; plút
Orðið þýðir; spjör, flík eða skart.
Dæmi; Ég átti ekkert hreint plút til að klæðast. Birta hengir oft á sig plút þegar hún vill vera fín.

Í tilefni þess hvað mér leiðist

2010-02-13T17:52:00.007Z

Gott kveld

Mikið ferlega leiðst mér. Mads er ekki heima, Helga er að leggja sig og Skvísa veitir ekki andlegan félagsskap að neinu gagni. Fyrir þá sem myndu koma með uppástungur um eitthvað klassískt eins og; taka til, baka eða sauma þá er það ómögulegt. Það er nefnilega svindl að ég sé að ryksuga og skrattst meðan Helga hvílist (og það er ekk nándar nærri nógu ógeðslegt hér til að vera rassakastast við einhver þrif), ég átti köku í frysti sem ég tók upp í gær og er búin með saumaverkefnin. Þetta er agalegt.

En að öðru. Skemmst frá því að segja að Ríkissjónvarpið náði ákveðnum hátindi í gær þegar það sýndi kvikmyndina ,,Glerbarnið". Þetta ris eins stærsta miðils Íslands hefur einnig verið rætt víðar s.s. hér; http://www.baggalutur.is/skrif.php?id=1705 auk þess sem málið er umtalað á Hvanneyri. Ég sá mér að vísu ekki fært að horfa á alla myndina því ég ,,þurfti" að fara í smávægilegt samsæti. Það er þó fullvíst að annað eins meistaraverk eins og Glerbarnið verður endursýnt áður en langt um líður.

Vegna sérlega góðrar tíðar síðustu daga hef ég farið í nokkrar góðar gönguferðir og þar af upp á tvö fjöll - Skeljabrekkufjall og Þverfell. Báðar ferðir voru mjög skemmtilegar, sérstaklega þegar maður var kominn upp. Læt myndir tala.

Ferðafélagar á Brekkufjalli, Krummi og Anna María

Pínu langt niður... húsin fyrir neðan allavega frekar lítil að sjá

Hér er Þverfell fremst (á máli innfæddra) í Lundarreykjadal

Hérna er ég alveg að komast á toppinn - magnað útsýni til austurs

Hér setti ég saman nokkrar myndir sem sýna útsýni af Þverfelli. Vatnið í forgrunni er Reyðarvatn (smellið á myndina til að sjá hana stærri ef vill)

Jamm og já... núna er Hreðjarsferð í gangi - sem ég lét fram hjá mér fara í þetta sinn. Mig langaði að vísu dáldið að fara en einhvernveginn nennti ég ekki. Sennilega er þetta ellin eða eitthvað slíkt. Ferðinni var annars heitið í Húnavatnssýslur þar sem meðal annars átti að skoða fjárhúsin heima hjá Siggu systur (Víðidalstungu) og Þorbjörgu (Böðvarshólum). En svona er þetta, ég valdi að vera heima og láta mér leiðast - way to go Mæja.

Þvílík bölsýni í þessu bloggi mínu. Ég ætti sennilega að láta þetta duga í bili.

orð dagsins: skuðrildi
orðið þýðir; kerlingarskrukka, dækja, flókatrippi eða garmur.
Dæmi; Á barnum var hópur skuðrilda. Margar verslanir bjóða til sölu afkáraleg skuðrildi sem kölluð eru tískufatnaður.

Janúar að klárast

2010-01-29T16:31:00.001Z

Jæja, nú er janúar alveg að klárast.

Þetta er nú búinn að vera meiri mánuðurinn - nýtt ár, engin icesave-lög, hellingur af handbolta, rúv í enn hraðari niðurleið en áður, húsleit hjá Íslandspósti (aldrei að treysta póstinum) og ég veit ekki hvað og hvað - já og J. D. Salinger er dauður - hvar endar þetta eiginlega?.... vonandi í febrúar.

Jamm og já.
Ég skellti mér á vinnuvélanámskeið í vikunni. Þrír unaðsdagar á Flúðum með gistingu hjá föður mínum. Bráðum get ég þá löglega ekið dráttarvél - þ.e.a.s. þegar ég verð búin að taka verklegt próf. Jess.

Handboltakarlarnir okkar eru aðeins búnir að skána í áliti með árangri sínum þarna úti í útlöndum - jafntefli eru samt ekkert töff að mínu mati. Jamm og já...

Þorrablótið í Tungunum var á föstudaginn var (Bóndadag). Þar var glaumur og gleði og læt ég hér myndir lýsa stemmingunni fram að þeim tíma sem ég fór heim (eftir að hafa gert þessa klassísku hluti, drukkið ótæpilega og gubbað).

Helga María (26) og Sævar (44) í góðu stuði

Hinn bitri sannleikur. Mæðgurnar Sigga (45) og Mæja (24) í hörkupósu

Hallgrímur (Rosagamall) og Þrúða (eitthvað yngri) sátu til borðs með okkur

Skemmtiatriði í anda kvenfélagisins. Maðurinn með víkingahjálminn er í hlutverki Rúnars Björns (21).

Sævar (44) og Trausti (27) voru heitustu gaurarnir að mati Siggu Jóns (45)

Óþekkt kvensa og Ívar Sæland (26) helltu rækilega í sig í tilefni dagsins

Tinna Jóns (26) og Birkir Kúld (25) rokkuðu á hinni svokölluðu vesturhlið (west-side)

Svona var svo stemmarinn daginn eftir. Helga (26) og Sigga Jóns (45) eins og sólargeislar

Jájá... þetta var nú skemmtileg sýning - þessar myndir og fleiri á myndasíðunni. Næst á dagskrá hjá mér sjálfri æsispennandi járninganámskeið núna um helgina og vonast ég til að geta lært margt og mikið af Lunddælska járningasnillingnum Sigurði Oddi.

yfir og út

Orð dagsins; síðkyssinn (lo)
orðið þýðir; seinn til kossa
Dæmi; ekki var Helga síðkyssin er hún hafði króað draumaprinsinn af.

Á síðkvöldum

2010-01-21T22:20:00.003Z

Gott kvöld góðir landsmenn

Ég var að horfa á handboltaleikinn áðan (eins og ábyggilega ógeðslega margir aðrir) og þetta var nú ekki laust við að vera spennandi. Helga var æsispennt - var sífellt eitthvað að hnippa í mig og góla upp yfir sig... En varðandi frammistöðu liðsins - þvílíkur endemis aulaháttur.

Þeir eru nú krúttlegir margir strákarnir í landsliðinu, þó þeir séu aular

Já þannig er nú það.

Ég er eiginlega alveg upp rifin yfir öllum kommentunum sem ég fékk á síðustu færslu. Ég hafði bara ekki gert mér grein fyrir að Útsvar væri svona mikið hitamál. En það er það greinilega. Ég vissi reyndar af þessu með Júró - það eru all margir sem eru sjúklega spenntir yfir því fokki en ég er blessunarlega nokkuð laus við það.
Ég veit ekki hvort ég get borið hér á borð einhver álíka hitamál í þessum pistli - icesave-málið er náttúrulega klassík en það eru allir orðnir leiðir á því. Kata okkar Kókó (litla brúna hórumamman) gæti kannski verið vinsæl (hún var náttúrlega svaka vinsæl, þessvegna er hún í þessum bobba) en það er ekki víst að hún nái neinum á skrið núna meðan hún situr í gæsluvarðhaldi. Tja... HEY já Þórhallur okkar hann er bara að hætta á Rúv - þvílíkur missir af þessum mannlega Ken! Ég er ekki viss um að ég muni nokkru sinni horfa aftur á Kastljós (ég hef að vísu aldrei horft á heilan þátt) fyrst hann er farinn. Hvað verður það næst? Ég sá á einhverjum fréttavefnum áðan að það eru miklar uppsagnir í vændum hjá Rúv - kannski verður Jóhanna Vigdís bara að láta eldúsið duga, fær ekkert að lesa fréttir... og hugsanlega verður ekkert ,,klukkan er sex, Jón Tórdarson les fréttir" og það er reyndar komið á hreint að Spánarspjallarinn Kristinn R. Ólafsson hverfur af dagskránni fyrr en síðar. Ef þeir hætta með morgunleikfimina og óskastundina þá er ekki lengur til neitt Ríkisútvarp lengur fyrir mér.

SVEI

En það er nú svo. Heimlis og einkalífið er heldur jákvæðara en horfurnar í dagskrá Rúv. Þorrablót annað kvöld í Biskupstungum og stefnt á margt. Éta mikið af þorramat, drekka mikið af brennivíni (allar sortir vel þegnar - best í bland), hlæja sig máttlausan yfir skemmtiatriðum, dansa eins og vindurinn, koma Helgu á séns og vera frammúrskarandi fögur (eins og alltaf). Ég geri mér grein fyrir að ekki eru öll þessi markmið raunhæf - en það er allt í lagi svo framarlega sem það verður gaman.

Eins og glöggir lesendur og aðrir velunnarar hafa kannski áttað sig á verður Mads ástmaður minn ekki á Þorrablóti. Hann er, að því er virðist, frekar skemmtanafælinn maður og sækir því ekki í svona samkomur. Blessunarlega vegur hin skemmtanafíkna sambýliskona okkar, Helga, upp á móti heimóttaskapnum í kærastanum og veitir félagsskap á hverskonar skemmtunum og skralli. Heimóttaskapurinn kemur auk þess að góðum notum hvað varðar pössun á hundum og öðrum búfénaði.

Hann er nú dáldið sætur þó hann vilji ekki fara að heiman

Jæja er þetta ekki gott í bili.

orð dagsins; böllhökt
orðið þýðir; dund, gauf
dæmi; Stúlkan böllhökti við prjónaskap. Óttalegt böllhökt var á unga manninum við verkin.

Nýtt ár

2010-01-14T11:20:00.005Z

Góðan daginn og gleðilegt nýtt ár

Hvað finnst ykkur um Icesave-málið og synjun forsetans? Persónulega er ég orðin dáldið leið á þessu öllu saman og, ljótt að segja það, er ég næstum þakklát fyrir hamfarirnar á Haítí - þær krydda fréttirnar allavega aðeins. Svo maður haldi nú afram í þjóðfélagsumræðunni þá eru helstu hornsteinar íslenskrar menningar komnir á dagskrá útvarps og sjónvarps, nefnilega ,,Gettu betur" og júróvisjón. Gettu betur sleppur nú en þetta júróvisjón er nú dáldið leiðnlegt. Hver ákveður eiginlega hvað lög eiga að fá að vera í þessum forkeppnum? og hver ákvað að það ættu að vera svona ógeðlsega mörg lög? og hvers vegna í ósköpunum eru mörg þeirra svona óskaplega leiðinleg og sí og æ spiluð í útvarpinu???? Ég er ekki hrifin af þessu en trúlega eru júróvisjónáhugamenn himinlifandi. Já en talandi um hornsteina menningar - ,,Útsvar" ætli þetta sé ekki örugglega síðasta serían af því? Ég viðurkenni reyndar að ég festist oft yfir því en ég fæ alltaf kjánahroll við að horfa á það.

Skruppum í gönguferð á annan í nýári. Hér má sjá Borgarfjarðarbrúna ef vel er að gáð

En nóg af tuði, kíkjum á æsilegt og spennandi heimilslíf mitt. Mads er veikur núna, situr í sófanum, hóstar og horfir á danska ríkissjónvarpið. Hundarnir eru blessunarlega sofandi núna en þeir stóðu að sameiginlegri tilraun til að rústa geðheilsu minni í gær - þau voru óþolandi, aldrei kyrr, vældu og vesenuðust, báðu um að fara út en vildu svo strax koma inn aftur og þar fram eftir götunum. Þrátt fyrir þetta virðist ég ver nokkuð heilleg á geðsmunum í dag.
Kennslan er hafin á ný eftir jólafríið. Er mestmegnis að kenna bændadeild 1 þessa önnina. Er í ferli að læra þekkja þau núna - var reyndar búin að koma inn í hausinn á mér slatta af nöfunum en þar sem þau eru alveg 24 þá vantar enn svolítið uppá.

Svona lítur sambýliskona mín oft út eftir vinnudaginn - krúttlegt ekki satt?

Ég er ekki frá því að skammdegið sé aðeins að minnka (enda á það að vera að því) það var allavega ekki alveg kolsvartamyrkur í gærmorgun klukkan korter yfir 10. Svo sést sólin næstum því hérna á Hvanneyri núna sem er náttúrulega óyggjandi merki um rénun skammdegis.

Jájá jæja. Framundan er æsispennandi prófsýning í nautgriparækt 1. og svo er Þorrinn náttúrulega á næstu grösum með blót, blóðmör og brennivín- Jess!

orð dagsins; saktmóðigur
orðið þýðir; hógvær
dæmi; Helga var saktmóðig varðandi gang ritgerðarinnar.

Síðasti sjéns...

2009-12-31T11:40:00.002Z

...til að standa við áramótaheitið 2009

Jæja 31. desember mættur og enn ekki allt farið til fjandans á Íslandi. Kannski að árið 2010 verði þess heiðurs aðnjótandi að verða; ,,árið sem allt fór virkilega til fjandans á Íslandi" - þó segja kannski sumir að það ár sé þegar liðið, hafi verið árið 2008.

En tökum upp léttara hjal. Jólin eru enn ekki búin þó hátindur þeirra sé vissulega liðinn. Allt fór jólastandið ágætlega fram hjá okkur Mads. Maturinn var sjúklega góður, innihald pakkana frábærlega flott og veðrið með ágætasta móti.
Mads var að vinna núna fram til 27 og gerði ég mér það til dundurs að skreppa með honum í fjósiða - bara svona til að gera eitthvað. Annars hefur tíminn að mestu farið í að gera fátt og lítið, listsköpun, gögnguferðir, bíltúra og svo hefur búskapnum (hænum, kanínum, öndum, hundum og Helgu þegar hún er heima) verið sinnt.

Það bar til (loksins-loksins) um þessar mundir að bláberjavínið varð tilbúið til átöppunar. Vínið er hreint ekki alslæmt og má jafnvel ætla að það verði hæft til drykkjar einhverntíma. Þá er bara að bíða þess að krækiberjavínið gerjist til fulls og þá ætti berjavínsárgangur ´09 í brugghúsinu að vera tilbúinn.

Ég ætla til tilbreytingar ekki að setja myndir hér inn af þessum heimsviðburði (jólunum hjá mér og fleiru) heldur á myndasíðuna - tengill hér til hliðar.

Nú svo er náttúrulega gamlárskvöld í uppsiglingu og er stefnan að þessu sinni sett á að éta ótæpilega af villibráð og svínahamborgarhrygg ásamt meðlæti. Sennilega verður svo horft á annaála, áramótaskaup og að sjálfsögðu tappadansinn ómissandi.

Orð dagsins; dröslur (no, kvk)
Orðið þýðir; gamlar fataslitrur, bókaskræður, eitthvað fánýtt.
Dæmi; upp úr jólapökkunum kom ógrynni af dröslum.

Bráðum koma...

2009-12-22T10:15:00.015Z

Góðan daginn

Þetta er allt að bresta á... það er svo sem bara fínt, það hefur allavega rekið mann áfram við nokkuð sem þarf að gera öðru hverju - þrífa. Skita hvað það er nú leiðinlegt verk. En allavega, í gær höfðum við Mads okkur í það og tókst bærilega til.
Myndir

Allt á rúi og stúi, Mads hálfur inni í elhússkáp - þar sem krukka með einhverju jukki hafði lekið

Heimilið komið í þokkalegt horf, búið að skreyta jólatréð og hvaðeina

Svo var jólaföndur - það er sko ekkert grín

Ég reyndi að sýna þolinmæði og festu við föndrið

Mads er kominn með jólaklippinguna og fléttuð jólahjörtu

En aðeins frá búrekstrardeild MSJ-Hvanneyri
Mads fór í bæinn á laugardaginn meðan við Helga skelltum okkur í jólagjafaleiðangur á suðurland. Allt í lagi með það en á sunnudaginn þegar ég kíkti með Jörgensen í pútnahúsið hafði þar bæst í hópinn - 3 feldkanínur. Þær hafa fengið nöfn heimilsmanna, Helga, Mæja og Mads og eru með rosa fínan og mjúkan feld. Núna þarf ég því að fara kynna mér verkun kanínuskinna til að geta svo með köldu blóði slátrað og fláð litlu kanínuungana og gert eitthvað fallegt úr skinnum þeirra meðan ég treð í mig kanínusteik.
Myndir

Endurnar - held að þær heiti ekki neitt ennþá

Hluti af hænsnunum, haninn Dóri er fremstur á myndinni

Feldkanínan Mæja

Mads gengur um búrekstarbyggingar sínar

Jájá svona gengur það. Annars er nú lítið að frétta það gerist að sjálfsögðu aldrei neitt bara Icesave og Mikkelsen úrsmiðir og svona eitthvað skítti. Já annars kíkti ég aðeins á heimaslóðir um helgina, kíkti á búfénaðinn og fjölskylduna.
Myndir

Þetta er smálambið mitt hún Klæba

Hér eru kynbótahrútarnir Botni og Náttfari, þeir eru báðir spakir

Þrefalt G, Geysir, Gandur og Gammur. Dinni og Krulli á bakvið

Króna og Pjakkur

Orð dagsins; Drjóla (so.)
Orðið þýðir; fara hægt, dunda eða (um hross) fara allgreitt
Dæmi; Ég drjólaði í útsýnisbíltúr. Heimilsfólkið drjólaði við jólaföndur. Dinni drjólaði heimleiðis.

Ár og dagar líða...

2009-12-17T09:57:00.003Z

Góðan dag

Enn líður á desember - undarlegt, hvern hefði grunað að það myndi gerast?

Jólundirbúningur hefur aðeins gert vart við sig á heimilinu, fór til að mynda í hina ljótu Reykjavík á dögunum. Tilgangur ferðarinnar var að vísu ekki ,,jólaferð" upphaflega heldur tannlæknisferð - hafði nefnilega ekki farið til tannlæknis í einhver 4 ár - en vegna tímasetningarinnar (11. des.) þótti kjörið að nota ferðina í jólavesenið líka.
Ferðin var ágæt, tók Helgu að sjálfsögðu með enda förum við mun oftar saman í leiðangra en við Mads. Byrjaði á því að skila Helgu á Keldnaholt en fór sjálf í kaffi til Völu vinkonu - sem er ákveðinn árangur því ég hef margoft ætlað að heimsækja hana en ekki tekist fyrr en nú.
Svo kom að tannlækninum en hann er sérlega óheppilega staðsettur fyrir sveitalubba - á Rauðarárstíg - ótrúlega vel gekk að komast þangað. Tannlæknaferðin gekk eins og í sögu engar holur og veskið ekki galtómt að heimsókn lokinni.
Síðan tók við einn staður af öðrum, Kringlan, RL-búðin, Elko, Garðabær og Hafnafjörður og ég veit ekki hvað og hvað og heim vorum við komnar 13 tímum síðar eða svo klukkan 22:30.

En fleira hefur svo verið dundað, bakaði flatkökur um daginn og svo undum við Birta okkur í laufabrauðsgerð í gær - með frábærum árangri eins og við var að búast. Vegna kreppunnar hef ég svo verið að föndra jólagjafir eins og maður gerði í gamla daga og er, eins og þá, þokkalega ánægð með árangurinn og býst við miklum og fallegum þökkum fyrir. Já! og svo voru skrifuð jólakort, sögulega mörg, meira að segja fleiri en 10, hugsa sér.

Laufabrauðið okkar Birtu er eins og sést ekki eins og hjá fínum Þingeyskum húsmæðrum

Síðan er kennslan þessa haustönn búin, var með próf á mánudaginn sem allir nemendurnir náðu - sem var eins gott fyrir þau því það er afar leiðinlegt að gera endurtektarpróf og sitja yfir þeim. Annars eru allir að verða búnir í prófum, ég held að flestir fari heim í dag og þá hefst líklega þessi skemmtilega Hvanneyrar-jólastemming; ekki köttur á kreiki og ekki rassgat að gera... þannig var það allavega í fyrra.

Annars eru það helstu fréttir og raunar helsti vandi þessara síðustu daga að hænurnar hans Mads eru farnar að verpa eins og hríðskotabyssur. Eggin hrúgast upp og ég hef hvorki hugmyndaflug né nennu til að baka úr þeim öllu auk þess sem það er ekki sérlega hollt að troða í sig sætabrauði alla daga.

En já, þá er þetta gott í bili.

Orð dagsins er; þökta (so.)
Orðið þýðir; blakta daflega, vera um það bil að slokkna, smá lögg.
Dæmi; þvotturinn þökti á snúrunni. Það þökti á gamla sjónvarpinu í litla stund áður en það dó endanlega. Það þöktir á flöskunni.

Ungir folar og fleira gott

2009-12-05T18:33:00.003Z

sæl á ný

Langaði eiginlega bara að smella hérna inn einu litlu myndbandi af hrossum. Við ofurskutlurnar (ég, Birta og Helga) skruppum nefnilega á Snæfellsnesið á ungfolasýningu í gær. Þar var alveg slatti af efnilegum folum og mér að óvörum, Sparisjóður frá Hallkelsstaðahlíð sem ég hélt undir í sumar (því ég vann tollinn í happdrætti) en hafði ekki séð áður.

Annars hefur fátt gerst. Kennslan er búin í bili, ábara eftir að fara yfir nokkur verkefni og klára að semja próf. Prófið verður svo 14. des svo ég sé fram á að hafa tíma til að skrifa jólakort og taka til og þannig leiðinda vesen.

Orð dagsins; bölti
Orðið þýðir; hjalli, barð, hóll, þúst.
Unnsteinn hnaut um bölta. Stóð þar bær á bölta nokkrum.

Kannski er kominn vetur

2009-11-29T08:50:00.007Z

Góðan dag

Fyrsti almennilegi snjórinn er kominn. Ekki svo að skilja að þetta sé eitthvað svakalegt magn, bara dálítið meira en nokkrir millimetrar. Mér finnst hann vera mæta fremur seint, finnst endilega að hann hafi oft komið í október en að vísu farið fljótlega.

En já. Það er víst farið að styttast í jólin núna, fyrsti sunnudagur í aðventu - ég man reyndar ekkert hvaða þýðingu sá dagur á að hafa enda er það hreinasta aukaatriði. Eitt reynar veit ég að þessi dagur þýðir - jólavesenið allstaðar hefst fyrir alvöru. Jólalög, jólaauglýsingar, jólastress, jólahreingerningar, jólabakstur og jólaalltmögulegt. Ég er ekki komin í stuð fyrir þetta.
Annað sem þessi jólastyttingur þýðir er að það líður óðfluga að prófum. Ég þarf ekki að fara í neitt próf að vísu, bara búa til próf, vera með próf og fara yfir próf - sem er aðeins skárra en að taka próf sjálfur en samt ekkert stuð.

Þurfti að skreppa út rétt í þessu. Skvísa vildi nefnilega fara út að pissa - hún komst þó ekki lengra heldur en rétt út fyrir dyr því þar stóð hún föst í skafli. Ég varð því að drífa mig út og moka hundinn lausan.

Skvísa hafði það ekki svona notalegt í skaflinum

Út um svaladyrnar, sér á pallinn og í hornið á hundakofanum

Prjónaði peysu á Mads á dögunum. Tókst að gera mátulega peysu á manninn í fyrstu tilraun að þessu sinni. Síðast þegar ég prjónaði á hann peysu voru nefnilega gerðar 2 allt of stórar áður en passlegt eintak fékkst. Reyndar vildi svo leiðinlega til að þetta passlega eintak hvarf í flutningum í fyrrasumar.

Mads á landsmóti á Hellu í gömlu og glötuðu peysunni

Nýja peysan

Minni ykkur á nýstofnaða myndasíðu mína hérna til hliðar - myndir frá mér.

Orð dagsins; refbeinóttur
orðið þýðir. kiðfættur, gulur á hæklum (um sauðfé).
Dæmi; Lítil prýði er af refbeinóttum karlmönnum. Margt fjárins var refbeinótt.

Skammdegi

2009-11-23T15:45:00.004Z

Djöfull er erfitt að vakna á morgnanna núna - sama hvort klukkan er 6 - 7 eða 8 er alltaf jafn mikið kolsvartamyrkur - skollans möndulhalli.

En það er nú svosem alltaf verið að reyna að lýsa þetta eitthvða upp fyrir mann. Til dæmis var árshátíð nemendafélagsins ásamt hrútauppboði Hreðjars um helgina. Það var afbragðsskemmtun.

Þetta glæsilega mar (sigmar) á rætur sínar að rekja til dansgólfsins á árshátíðinni

Svo er nú farið að styttast í jólasturlunina sem er nú sennilega upphaflega hugsuð til að hressa mann við í skammdeginu (jájá og afmælið hans Sússa og allt það).

Enn einu sinni hefur bankanum mínu tekist að misnota tækifæri til að taka upp á ný nafnið Búnaðarbankinn - sem er klárlega skásta nafnið sem þeir hafa notað. Fyrst var það bara Búnaðarbankinn en hann sameinaðist svo Kaupþingi og úr varð - KB-banki (1). Svo var því breytt í Kaupþing (2). Svo hrundi allt og ríkið eignaðist draslið og kallaði það því frumlega nafni Nýja-Kaupþing (3). Nú fyrir fáeinum dögum var svo enn einu sinni breytt til og að þess sinni varð ónefnið Arion-banki fyrir valinu (4).

orð dagsins er; keikla (so).
Orðið þýðir; ganga hægt og þyngslalega.
Dæmi; Mads keiklaði heim af hrútauppboðinu.

Endurhlaðið

2009-11-16T09:22:00.002Z

Sæl á ný

Nú er svo komið að ég hef gefið hinni svo kölluðu smettisskruddu (e. facebook) leyfi vegna þess hve ferlegur tímaþjófur hún getur verið. Ég ákvað því að koma þessu bloggi í gang á ný, svona til að hafa eitthvað til að sóa tíma mínum í.

Í ljósi þess að ég nenni ekki að búa til glærur um mjólk og mjólkurvinnslu fyrir nautgriparækt 1 þá ákvað ég að skrifa nokkrar línur hér, þó ekki verði þær margar.

Annars óska ég okkur gleðilegs dags íslenskrar tungu.

Orð dagsins;
Hölkn
Orðið þýðir; grýtt og gróðurvana landsvæði, hrjóstur, flatt berg
Dæmi. Hölkn er víða á Tungnamannaafrétti.

blog póst

2009-03-26T14:31:00.003Z

Jæja... langt síðan maður
Í ljósi þess að ég sit heima með stíflu í helstu göngum höfðusins -vinstra megin - hef ég ákveðið að blogga.
Það er náttúrulega frá ótal mörgu að segja - nei samt ekki... eiginlega ekki nokkrum hlut þannig að ég ætla bara að tala um eitthvað óvenjulegt, eða setja inn nokkrar ferskeytlur...

Já það er nú meira ástandið í þjóðfélaginu - ný ríkisstjórn, lesbískur forsætisráðherra, sköllóttur fjármála-, landbúnaðar- og sjávarútvegsráðherra og menntamálaráðherra sem er svo ung að elstu menn gætu talið hana á grunnskóla aldri. Mér er satt best að segja alveg sama um þetta nema hvað ég nenni ekki þessu kosninga-fokki sem framundan er. Endalaus síbylja óþolandi frambjóðenda í útvarpi og sjónvarpi og ekki þverfótað fyrir auglýsingapésum með áprentuðum ógeðssmettum frambjóðendanna og innihaldslausum loforðum þeirra um bót og betrun - iss.

Sem betur fer er farið að styttast í sauðburðinn - ég er að verða æsispennt þrátt fyrir að sá tími muni óhjákvæmilega hafa í för með sér nætur með sundurslitnum svefni og tuð móður minnar.

Óðinn Gísla ógnarsvali,
óskaplega fríður.
Kerlingum í tugatali
tæki þetta flytur ljóð.

Núna bráðum þarf ég kannski að taka hlé út af kreppunni og tala við Snorra Sig. Ég er nefnilega búin að fá vinnu hjá honum og við þurfum að ræða hvað ég eig að gera og hvenær ég geti byrjað...

...............

Fór í viðtal... hvað haldiði að hafi verið þar annað en frambjóðendur - jakk...

jæja... nenni ekki að hafa orð dagsins

...ýmist í sleik eða slagsmálum...

2009-01-05T18:50:00.006Z

Jæja... nú er það komið árið 2009. Hvern hefði órað fyrir því?

Ég kom mér hjá því að skrifa nokkuð í desember enda var þokkalega mikið að gera þá aldrei slíku vant. Prófagerð, ritgerðaskrif, prófayfirferð og svo bráðskemmtileg veikindi sem hindruðu mig í áti um nokkurn tíma og örsökuðu það að ég neyddist til að reka við með aðgát í nokkra daga. Sem betur fer var það liðið hjá þegar jólaátið gerði innreið sína.

Við Mads áttum rómantísk jól tvö saman ásamt hundinum. Ekki sérlega rómantísk samt, við erum ekki rómantískt fólk auk þess sem Mads var aðallega úti í fjósi að sinna kúm. Ég eyddi tíma mínum mest í að láta mér leiðast þar sem veðurfarið hérna bauð að vanda ekki upp á neina útiveru eða slíkt.

Jólamaturinn var: sjávarréttsúpa í forrétt, gæsabringur og gráðostakartöflur í aðalrétt og jólaís frá Kjörís í eftirrétt

Jólagjafaheimtur voru ágætar, slatti af bókum, einkum um kynlíf og sakamál auk náttfata, handklæða, hnífapara, dekkjaviðgerðasetts og svo kom gjafabréf á saumavél. Haldin voru litlu-jól með góðum hópi en þá var einmitt étið svolítið meira og teknar upp nokkrar gjafir í viðbót (þar reyndust vera tveir hlutir af óskalistanum, fjölnota töng og útivistarlegghlífar).

Nú áramót komu líka. Enn étið, svo partý - kom meira að segja fólk sem við þekkjum ekki, eða allavega lítið. Hundarnir reyndst ekki vera sérlega þolinmóðir gagnvart rakettusprengingum, sátu skjálfandi undir stofuborði meðan nágrannarnir kveiktu í hverjum 5000-kallinum á fætur öðrum með tilheyrandi látum og ljósadýrð.

Birta, líklega með einn fyrsta bjór ársins

Annar dagur nýja ársins reyndist dagur viðburða. Helgi og Guffa gerðust foreldrar rauðhærðs (surprise!) afkvæmis af kvenkyni og við Helga skelltum okkur á heimaslóðir mínar að sækja afþreyingu - 3 stykki hross. Allt mun þetta hafa gengið stóráfallalaust fyrir sig.

Króna er eitt þeirra hrossa sem sótt voru í Árnessýsluna

Núna er tæp vika í að skólinn hefjist á ný. Ég ætla að taka á honum stóra mínum og sækja einn áfanga og fer því í skólann einu sinni í viku. Kannski kíki ég svo eitthvað á lokaverkefnið mitt og kenni bændadeild 1 fóðurverkun. Aldeilis spennó tímar í vændum.

Jæja segjum þetta gott í bili. Kannski ef ég verð duglega geri ég annál 2008 á næstunni, hver veit.

Orð dagsins er eyrnasmolt.
orðið þýðir; eyrnamergur.
Dæmi: Ætíð skyldi hreinsa eyru sín af eyrnasmolti. Ekki bragðast Campari sem eyrnasmolt.

ólund

2008-11-30T13:51:00.003Z

Góðan dag

Það er kalt í dag, mjög kalt. Mér leiðist - ég gæti vissulega unnið þau verkefni sem ég á eftir að vinna en þau eru einkum:

Finna út hvað ég á að skrifa um í heimspekiritgerð
Byrja að skrifa heimspekiritgerð
Klára aðferðafræðiverkefni
Búa til verkefni í sauðfjárrækt
Búa til fyrirlestur í sauðfjárrækt
Þrífa - það er víst alltaf þörf á því

Ekkert þessara verkefna þykir mér neitt sérlega spennandi - ef ég að segja alveg eins og er.

Jamm og já... það er nú lítið búið að gerast svosem - var reyndar árshátíð LbhÍ um daginn og hið sívinsæla hrútauppboð Hrútavinafélagsins Hreðjars. Það fór allt fram eins og venjulega. Bílarnir komnir í gegnum skoðun - sem er einstaklega gott (vísu aðeins átök fyrir sparibaukinn).

Ég er alveg að verða búin að kenna - bara tvær kennslustundir eftir og þær eru á fimmtudaginn - Sjibbí

Nú nenni ég ekki að skrifa neitt meira

Orð dagsins: etjukostur
Orðið þýðir: óblíð eða hörð kjör
Dæmi: Í hönd fara tímar etjukosta. Öngva líður alþing etjukosti.

Haust

2008-10-15T10:54:00.013Z

Jæja það er komin meira en nógur tími síðan hér hefiði átt að skrifa eitthvað síðast. Ég ætla ekki að vera með neinar afsakanir og vinda mér bara beint í að segja frá liðnum atburðum og auðvitað barma mér yfir efnahagsástandinu.

Bíðum nú við. Síðast þegar ég skrifaði hér áttum við Helga eftir að fara með hrossin mín heim og allt það. Ferðin með hrossin gekk ljómandi vel, allar tegundir veðurs voru í boði og ýmislegt átti sér stað á leiðinni. Fyrsta daginn fengum við ljúfan rigningarsudda upp Lundarreykjadalinn og fengum að auki samreiðarmenn frá Gullberastöðum. Annan daginn fengum við enga samreiðarmenn enda var aftaka skituskítaveður, rok og rigning í fangið. Leiðin lá í Brunna en þar er skáli sá er leitarmenn Lunddælinga liggja í fyrir smalamennskur. Þangað komumst við og var það mikil hetjudáð. Tók þá við ferðin yfir Uxahryggi og var þann daginn ljómandi veður. Nokkur óvissa var um staðsetningu á tímabili en úr því rættist og komumst við á leiðarenda seinnipart dags. Þann dag þurfti að járna einn fót og Helga glataði nýkeyptri tóbakssprautu sinni. Síðasti dagurinn bauð upp á glampandi sól og engin vandamál. Þannig var nú það og leitt að segja frá að ég tók líklega enga mynd í þessu ferðalagi.

Svo var haldið á fjall þar sem allt fór tiltölulega vel fram að þessu sinni.

Allt of snemma hófst svo að sjálfsögðu skólinn. Óheyrilega spennandi áfangar í aðferðafræði og heimspeki hafa þó vissulega létt lundina með spennandi vekefnum og líflegum umræðum. Í asnaskap gekkst inn á að kenna bændadeild svolítið - það er nokkuð sem þarf tíma til að venjast en er þó jafnframt fræðandi og skemmtilegt á köflum auk þess sem það ætti að gefa eitthvað af sér peningalega.

Í fyrsta sinn lá leið mín í Skagfirskar stóðréttir. Eftir langa ökuferð var loks lent á Sauðarkróki og litið á reiðhallarsýningu í Svaðastaðahöllinni - var það fremur tilkomulítið að mínu áliti. Öllu tilkomumeiri var sú upplifun að koma inn í hin víðfræga Ömmubæ á Skörðugili og mun það mér seint úr minni líða.

Dísa, Helga og Birta hreiðra um sig við eldhúsborðið í ömmubæ

Eftir nótt í ömmubæ rann upp réttadagurinn og var að sjálfsögðu haldið að Laufskálum til að taka út réttastörfin. Margt var þar manna og ekki allir frýnilegir en það er náttúrulega eins og gengur.

Eyþór, Valdi frá Skarði og óþekktur við réttavegg

Kalli og Jóhanna í Þjórsártúni ásamt Emil á Grafarbakka

Björn bóndi í Útlíð lét sig ekki vanta enda aðalgæinn hvar sem hann fer

Eftir réttirnar ætlaði hópurinn (ég, Birta og Helga) að fara í sund á Króknum en reyndist þar allt lokað og læst. Brugðið var því á það ráð að hitta fóstra Helgu (Karl í Þjórsártúni) og hans fylgdarlið og leggjst þar í heitan pott - fór það vel. Að kveldi réttadags var svo farið á mikinn dansleik í reiðhöllinni. Margt var þar manna en einn tók klárlega öðrum fram um töffheit og vinsældir, nefnilega tengdasonur Borgarfjarðar Eyþór Einarsson.

Steingrímur ásamt ástkonu sinni, Ingu Völu

Eyþór að segja eitthvað mjög merkilegt (hlýtur að vera)

Aðrir af okkar fylgdarfólki áttu svo nokkuð góðan leik þetta kvöld en mun það ekki nánar rætt hér. Sunnudagseftirmiðdag var svo haldið heim eftir góðan snæðing og krufningu á atburðum næturinnar.

Ýmislegt fleira hefur verið brallað s.s. var farið á dansleik ekki fyrir löngu upp í Bæjarsveit þar sem var dansað og drukkið auk þess sem hatrammar keppnir voru háðar. Hestefnið mitt sem ég fjárfesti í á síðasta ári var svo á dögunum fluttur í Arnarholtið þar sem hann mun læra góða siði af gæðingunum þar. Bíldruslan mín (sem Mads á reyndar) hefur nú loks öðlast þá akstursleiginleika sem hún á að hafa. Það kostaði ekki nema skipti á 2 dempurum, einum bremsluklossa, viðgerð á nokkrum bremsudiskum, hjólastillingu og nýja hjólbarða.

Gandur í hesthúsinu á Gullberastöðum

Andastofninn á Gullberastöðum

Nú standa yfir skriftir á vísindagrein fyrir aðferðafræðiáfangann. Vísindagrein þessi er mér ekki auðveld skrif þar sem hún skal vera á ensku máli en mér hefur aldrei verið auðvelt að rita á ensku.

Sennilega hefur enginn látið fram hjá sér fara kreppuhjalið alltaf allstaðar. Kreppan kemur lítið við mig þar sem ég skulda ekki neinum nokkurn hlut (nema kannski einn og einn bjór og einhverja greiða). Helstu áhrif kreppunnar á mig eru þau að ekki er horfandi eða hlustandi á fréttir eða lesandi nokkur blaðsnepill nema yfir mann hvolfist kreppufréttir.

-hvað er þetta annars með þessa ,,nýju" banka, hafa menn ekkert hugmyndaflug??? Nýi landsbankinn, nýi glitnir?? Allt í lagi að einn banki heiti nýi eitthvað en þetta... Ég geri það að tillögu minni að það verði ekki stofnað neitt nýja kaupþing heldur einfaldlega Búnaðarabankinn - gamla merkið og allt.

Heyrðu já svo var á dögunum verið að vigta, ómskoða og slátra heima. Allt fór þetta ágætlega, þyngsta lambið ein 67 kg, einlembingshrútur undan Fjólu hans Teits og Gola sæðingahrút (eitthvað um að löm bæru 60+ kg og slatti 50+). Ómskoðunin ágæt, lærin að vísu aldrei neitt úrval en frambygging jafnan góð. Meðalvigt úr slátrun (um 200 lömb) reyndist vera 19,0 kg... gerð eitthvað um 10 og fita kringum 8.

Jæja ég ætla að halda áfram að bora í nefið.

Orð dagsins: Kýldur (lo.) - vel (illa) kýldur-
Orðið þýðir: -(um karlmann) hafa stóran(lítinn) kýl, vera mjög (lítt) vaxinn niður.
Dæmi: Ekki reyndist Kjartan illa kýldur. Vænn er vel kýldur maður.

Sumarið búið?

2008-08-26T13:32:00.010Z

Jæja sæl

Langur tími engin skrif. Hverjum er ekki sama.

Það hefur margt gerst síðan síðast en þó svo það sé margt var það ekki sérlega fjölbreytt - í megindráttum bílferðir til ýmissa staða (landsmót, heim í Arnarholt, landbúnaðarsýning á Hellu og margt fleira), bjórdrykkja og útreiðar. Svo hef ég náttúrlega bara verið í vinnunni og svona klassík en sumarvinnunni var slúttað með fyrirtaks vinnupartýi á föstudaginn var.

Skólinn er hafinn núna, var í fyrsta tíma í morgun. Mér til mikillar ,,gleði" er verið að kenna í þessum áfanga efni sem ég er oft búin að læra áður. Framundan er svo svolítill reiðtúr frá Borgarfirði til Biskupstungna og síðan fjallferð.

Þar sem ég nenni ekki að hafa þetta neitt flóknara ætla ég svo bara að setja inn nokkrar myndir frá sumrinu.

Svana tjaldar á Landsmóti hestamanna á Hellu í júlíbyrjun

Siggi, Karí, Kolla, Helga og Mads í brekkustuði á landsmóti

Sindri og Mads streða við fyrstu mjaltir í rörmjaltakerfi á legubásum í Hvanneyrarfjósi

Við Helga viðhöfðum fagmannleg vinnubrögð við uppsetningu á hundagirðingu fyrir utan Sóltúnið

Krummi í útilegustemmingu

Óðinn Gíslason og Helga við DeLaval mjaltaþjóninn á landbúnaðarsýningunni á Hellu. Júgrin sem mjaltaþjónninn er að mjólka eru í eigu Helgu.

Orð dagsins er: Bíloka
orðið þýðir: doka við eða drolla
Dæmi: Rétt er að bíloka þar til Ragnhildur skilar sér. Birta bílokaði ekki við bjórneysluna.

Er þetta lífið?

2008-06-25T22:37:00.011Z

Sæl og blessuð

Á ferðum mínum um internetið og þá einkum svo nefndar bloggsíður hef ég oft séð nokkuð sem kallað er ,,punktablogg". Í þessari færslu verður einkum notaður sá stíll til að varpa ljósi á það sem gerst hefur síðan síðast var ritað.

Þann 30. maí útskrifaðist ég ásamt 4 öðrum af Búvísindabraut Landbúnaðarháskóla Íslands. Athöfnin var ekki sérlega mikil skemmtun enda saman komið heilmargt mis skemmtilegt fólk.
Ég byrjaði að vinna mánudaginn eftir útskrift og það er fínt, fínir vinnufélagar og oft ekkert svo leiðinleg verkefni. Að ógleymdu ágætis kaupi.
Skrapp í útskriftarboð til Hroddunnar og systur hennar. Dvaldi þar nokkra stund ásamt slatta af fólki sem ég þekki lítið sem ekkert, át kex og osta og fór svo heim.
Í þeirri sömu ferð keypti ég sundlaug í Europris fyrir Helgu Maríu sem haði verið á óskalistanum lengi.
Þegar heim kom úr Reykjavíkinni var sundlaugin sett upp og prófuð af Bitu, Helgu, Valþór og mér.

Glæsilegt? Mér finnst það...

Sundlaugaprófunin hafði í för með sér mikla ölvun og nokkurt ómynni en jafnframt mikla gleði og gaman.

Á barnum í ,,Havæ" skytunum frá Ástralíu

Man eiginlega ekki eftur þessu en mikið hefur verið gaman....

Um daginn var innflutningspartý hjá Silju og Dodda. Sigga systir, Mads og Helga María unnu keppnina um hver næði mestri ölvun.

Silja og Doddi í upphafi teitisins

Mads og Skvísa einhverntíma um nóttina þegar ég var farin heim

Daginn heftir partýið hjá Silju vakti ég upp draug (Helgu) klukkan 8:30 til að fara með mér heim til móður minnar að járna ein 8 hross. Draugurinn var ógeðslegur og ruglaður mjög en skánaði þegar leið á daginn og var orðinn hinn ljúfasti um kvöldið enda fékk hann þá að hitta Val á Gýgjarhóli.
Barbara hringdi og sagði að íbúð sé laus í Mýrinni sem þýðir að Mads megi fá hund. Hann er að spá í að fá Boxer...
Ég viðurkenni að ég er spennt fyrir að fá hundkvikindi
Í gærkvöld tók ég þátt í að reka féð á Syðstu-Fossum á afrétt, kom heim um hálf fimm í mogun - mikið er langt út í hesthús...

Birta í banastuði

Óðinn Gíslason býr sig undir útreiðar

Mætti í vinnu um hádegið í dag.
Setti símann minn í þvottavélina áðan, hann er að þorna á ofninum núna.

Svona er þetta nú búið að vera og segi bara eins og maðurinn um árið ,,þetta er lífið"....

Framundan er landsmót hestamanna á Gaddstaðaflötum, úje nema að Valþór karlinn kemst ekki með því hann verður að vinna... Mér þykir það raunverulega leitt...

Orð dagsins er: Pútlingur
Orðið þýðir: Þorpari, tíkarsonur. Smávaxinn maður. Lítill þófinn vetlingur.
Dæmi: Fjalla-Eyvindur var óttalegur pútlingur. Daníel Pálsson er pútlingur. Einhverstaðar á ég gamla pútlinga.

30. maí

2008-05-30T09:44:00.009Z

Gúten tag

Nú er maí að verða búinn, sem sagt, sumarið er svo gott sem komið. Síðustu 3 vikurnar var ég heima í Arnarholti í sauðburði og gekk það vel.

Gríma með lömbin sín, gráa gimbur og svartbotnóttan hrút.

Golsa (ærin mín) með sín afkvæmi, gráan hrút og grágolsótta gimbur.

Heimóarnir Belgur og Kríla

Það er svo helst í fréttum að bifreið mín fögur af Daihatsu Rocky gerð hefur verið sett á eftirlaun. Arftaki Rockys er að sjálfsögðu eftirbátur hans um fegurð, glæsileika, reynslu og um fram allt sál en engu að síður margfalt kraftmeiri, rúmbetri, hljóðlátari og hraðskreiðari. Arftakinn var tekinn í reynsluakstur inn á afrétt núna á miðvikudaginn og fór það vel.

Arftaki Rocky (Landcruiser 90 LX) staddur í Sultarkrika við Sandá. Bláfell í baksýn.

Í þessa reynsluakstursferð fórum við systkinin úr Arnarholti og höfðum með í för sívinsælan harðfisk, smér og kókómjólk.

Teitur og Bjarni í einum hellanna í Hellragili, skömmu síðar var harðfiskurinn tekinn upp.

Nú er ég svo snúin aftur á Hvanneyri til að útskrifast, stunda almennan ólifnað og vinna. Hér á að halda til í allt sumar og því eru hingað komnir allir mínir hestar auk hestanna hans Mads og Krónu - sem er gott.

Móðir Krónu, Kolbrún frá Flesjustöðum, mátar forláta kliftöskur.

Orð dagsins er: Flapalegur

Orðið þýðir: að vera hirðulaus um klæðaburð og framkomu.

Dæmi: Jafnan er ég fremur flapaleg. Forsetinn var flapalegur í heimsókn sinni til Melrakkasléttu.

Áfangi?

2008-05-02T20:12:00.003Z

jæja gott fólk, ég er búin að fara í síðasta prófið og skila BS-ritgerðinni.

Nú dettum við í það!

Orð dagsins er: fyllerí

Þýðing: veruleg áfengisneysla. mikil ölvun.

Dæmi: Hvanneyringar fóru á fyllerí. Mikið fyllerí var þetta kvöld.

Mars blogg...

2008-03-24T18:26:00.004Z

Gleðilega páska...

Jæja það óheyrilega langt síðan síðast og sennilega verður langt þangað til næst.
En það er nú kannski ekki frá mörgu að segja og í raun hundleiðinlegt að lesa upptalningu á löngu liðnum atburðum sem margir lesendur hafa jafnvel tekið þátt í og vita þar af leiðandi allt um. Þess vegna ætla ég aðeins að segja frá páskunum.

Páskarnir eru haldnir út af Jesú eða Sússa eins og við þekkjum hann mörg. Sússi drapst nefnilega og lifnaði aftur við á páskunum og þykir það fremur merkilegt í ljósi þess að menn eru ógjarnir á að rísa upp frá dauðum. Nema Sússi, hann gerði það. Flóki prestur á Hvanneyri minnti hesta sína á upprisu Sússa með því að rita með svörtum túss ,,kristur er upp risinn!" á heyrúlluna þeirra. Mér virtust þeir ekki sérlega upprifnir yfir því.

En nóg um Sússa. Ég hef nefnilega gert margt og merkilegt um páskana. Ég hafði stór áform um að gera þetta og hitt um páskana og ótrúlegt en satt komst megnið af því í verk.

Nr. 1. Ég hugðist þvo utan af pullunum á ,,hvíta" sófanum hennar Siggu. Það ver varð að gerast á tíma sem þessum þegar nánast enginn er heima því annars er alltaf einhver liggjandi í sófanum. Ég þvoði utan af sófanum, setti á aftur og ryksugaði í stofunni frammi.

Nr. 2. Ég hugðist prjóna ný stroff á eina lopapeysu. Peysa sem átt hefur þrjá böðulseigendur; Jón Hjalta, Mads og mig þarfnaðist umönnunar á stroffum. Ég er búin að rekja þau gömlu af og byrjuð á ermastroffi 1.

Nr. 3. Ég hugðist fara í ,,útreiðatúr" á tamningartryppinu Krónu. Gerði það í dag og komst heil frá því enda merin hreint eins og ljós.

Nr. 4. Ég hugðist elda gæs í páskamatinn. Pabbi færði okkur einhverntíma gæs sem var búin að bíða NB frammi í frysti eftir tilefni til að vera snædd. Ég kom því í verk að elda hana í gær. Fylling úr samtíningi úr frysti og ísskáp og meðlæti að hætti hússins (pakkasósa og soðnar kartöflur). Ótrúlegt en satt smakkaðist vargfuglinn vel og ég hef í það minnsta ekki fengið drullu enn sem komið er.

Nr. 5. Ég hugðist sauma gardínur. Mamma gaf mér forkunnarfagurt gardínuefni fyrir löngu sem mig langði að sníða fyrir stóra gluggann í stofunni. Þessu kom ég í verk í dag. Reyndar er þetta ekki algjörleg fullkomið eins og glöggir menn sjá á myndinni en ég er ánægð með þetta.

Nr. 6. Ég hugðist klára heimildakaflann í lokaverkefninu mínu. Ég er allavega búin að senda heillangt rugl til leiðbeinanda míns til að setja út á - það er ekki þar með sagt að ég sé búin með hann...

Nr. 7. Mads ætlaði mér að baka flatkökur. Mads er mikill áhugamaður um flatkökuát og hefur því oft beðið mig að baka slíkt. Flatkökubakstur er sóðalegt vesen sem ég nennti ekki að standa í þessa páskana.

Ég er nokkuð ánægð með þetta því að auki fórum við Helga upp að Gullberastöðum á föstudaginn (langa). Þar barði ég augum og fák minn fagran og sá að hann hefur vel braggast í föðurhúsum. Einnig sté ég á bak ekta Gullberastaða gæðingi og reið honum sem leið lá til Oddsstaða. Þar veittur húsráðendur vel af rauðvíni, káli, kexi og ostum auk þess sem misskemmtileg málefni líðandi stundar voru rædd. Að loknum útreiðatúr fórum við svo í sund í Brautartungu sem var unaðslegt.
Þessa páskana höfum við Mads einnig haft umsjón með hinum mjög svo þurftafreka Ljóna (kötturinn hennar Silju). Ljóni þarf töluverða athygi og oftar en ekki á leiðinlegum tíma s.s. þegar ég er að reyna að sofa. Hann gerði til dæmis tilraun til að brjótast inn í svefnherbergi í morgun klukkan 7:00. Ég barðist hetjulega - henti honum út í runna og lokað glugganum.

Jájá... í kvöld er ég að hugsa um að gera kannski ekki neitt... eða horfa á ódauðlegt kvikmyndalistaverk á Rúv... eða eitthvað.

Orð dagsins: (að) vöfla.
Orðið þýðir: masa eða þvaðra.
Dæmi: Aldís á það til að vöfla út í eitt. Fyllerýisvöfl er oft á tíðum skemmtilegt.

Sæl

2008-02-17T20:52:00.008Z

Gott kvöld gott fólk

Vegna þess að ég nenni ekki að læra hef ég tekið þá ákvörðun að blogga. Leiðnlegt er frá því að segja að ég hef ekki frá neinu að segja svosem... svo ég sýni kannski bara nokkrar myndir:

Jólakort fjósamanna í Hvanneyrarfjósi 2007

Ljóni svaf eitt kvöldið gífurlega vært hjá Mads sem skemmti sér við lestur martreiðslubókar

Helga og Birta tóku eitt létt scrabble einhvern daginn fyrir skömmu

Birta sló öll fegurðarmet eftir að hún setti upp bjórgleraugun í afmælisboði sínu, jafnvel Einar féll í skuggann

Ég, Hróðný Hildur og Rannveig í pissustoppi á leiðinni á pakkhúsið einhverntíma í 4.bekk. Síðar um kvöldið ældi ég í bílinn við lítinn föguð viðstaddra og þá einkum bíleigandans. Góðir tímar...

Jæja... þá er ekki fleira í þættinum í kvöld, góða nótt.

Orð dagsins: Hvotla (sagnorð)
Orðið þýðir: að hnuðlast með, handfjatla, dútla við.

Dæmi: Margir hafa hvotlað grjónakoddann. Gaman er að hvotla við prjónaskap.

Vetrarveður - loksins

2008-01-29T11:54:00.000Z

Komiði sæl

Nú er janúar að verða búinn og nokkuð hefur gerst síðan síðast.
Helga hélt til dæmis upp á afmæli sitt og er nánar sagt frá því á bloggsíðu hennar og Birtu http://www.bruggarar.blogspot.com/
Eftir að afmælismálsverðurinn hafði verið snæddur var farið á barinn eins og svo oft áður.

Helga og Birta í afmælissæluvímu á Kollubar þann 17. janúar

Dagana 19 og 20 janúar stóð yfir hin víðsfræga Hreðjarsferð. Farið var víða og margt merkilegt skoðað. Óvæntar uppákomur settu nokkurn svip á ferðina s.s. smávægilegur ruglingur á Gunnurum í Bæ og koma eins samviskusamasta námsmanns Hvanneyrar í veiðihúsið við Laxá í Dölum. Gaman að því.

Hér er má sjá Steingrím við Steingrímsfjörð.

Helgi Haukur lék listir sínar á Lambeyrum

Það var gríðarlega fagurt um að litast í Kolbeinsstaðahreppnum á sunnudeginum

Nú að lokum ber að segja frá eighties-diskóinu sem haldið var síðastliðinn fimmtudag. Allir voru klæddir í sitt fínasta púss og held ég að flestir hafi skemmt sér nokkuð vel.

Ég og Mads, ómótstæðileg að vanda
Lilja og Valþór í örstuttri pásu frá trylltum dansi

Heiða var ekki mjög ólík sjálfri sér þetta kvöld

Þorvaldur Kirstjánsson setti upp trefil frá árinu 1985 og dansaði frá sér allt vit

þá er nú ekki margt annað að segja í bili nema kannski að ég elska kúadóma.

Orð dagsins er: fritt

Orðið þýðir: vært, friðsamlegt/kyrrt

Dæmi: Fritt svaf Unnsteinn í sófa. Nú er ekki fritt veður.

Ógnarlangur tími er liðinn

2008-01-16T20:26:00.000Z

Komiði sæl

Sennilega hefur ekki farið framhjá mörgum að það er komið spánýtt ár, árið 2008. Hver hefði búist við því að þetta ár kæmi nokkurn tíma... ég áttaði mig á væntanlegri komu þess í fyrra. Fyrir þann tíma hafði ég bara ekki pælt neitt í því... en allavega það er hér.

Nema hvað.

Síðan síðast hefur eflaust margt merkilegt en ég man svo sem ekkert af því núna. Ég man reyndar að ég eyddi jólunum með föður mínum öldruðum og einnig áramótunum.

Pabbi á jólunum

Kom svo á Hvanneyri þann 6. janúar. Þá var kominn nýr íbúi á Árgarð í stað Boggu, Helga María... nú eru liðnir réttir 10 dagar og ég hef þegar vanist henni ágætlega.

Nú eru stórviðburðir í nánd s.s. afmæli fjölda fólks og hin stórmagnaða Hreðjarsferð. Helstu afmæli eru: afmæli Helgu Maríu á morgun (17. janúar),

Helga á spjalli við Maríus í Hreðjarsferð í janúar 2007

afmæli Bergþóru á föstudag (18. janúar),

Bergþóra (nær) og Vala í Mexíkó 2005

afmæli mömmu gömlu (25. janúar)

Mads og mamma á þorrablóti í janúar 2007

og svo afmæli Birtu (9. febrúar).

Helga, Birta og Mads á barnum í haust

Hreðjarsferðinni er heitið á Strandir og í Dali og er gert ráð fyrir geypilegu fjöri.
Þar til næst, verið æst (haha aulalegur orðaleikur)

Orð dagsins er: Svás (skáldamál)
Orðið þýðir: hlýr, blíður, kær, viðfelldinn/þægilegur, ljúffengur.
Dæmi: Jakkinn er svás. Mads er mér svás. Pottrétturinn var svás.

Gleðistundir

2007-11-19T21:08:00.000Z

Gott kvöld (af því að það er kvöld hjá mér sko)

Nú er komið að því að ég skrifi aðeins hér og er ærin ástæða fyrir því; nýliðnir atburðir í skemmtanalífinu.

Á föstudaginn var haldið hrútauppboð þar sem boðinn var upp Hreðjar V. Hreðjar þessi er myndarskepna og spök og ekki spillti fyrir að stjórn hrútavinafélagsins Hreðjars var búin að bursta og ,,effola" gripinn (effol er efni sem notaðar er í fax og tagl hrossa til að gefa gljáa).

Uppboðið í undirbúningi, verið að hella í glösin og skera hangiketið

Ragnheiður Másdóttir frá Háholti hrútahvíslari með Hreðjar V

Met fjöldi hluta var seldur eða yfir 200 sem þýðir að hrútavinafélagið veður í peningum - sem er ljómandi gott. Að vanda fóru svo allir á barinn eftir uppboðið og héldu áfram drykkju og voru sumir fyllri en aðrir.

Á laugardag var svo komið að því, árshátíð. Undirbúningurinn var búinn að vera strembinn, skreytingar, upptökur, reddingar og ýmislegt fleira sem óhjákvæmilega fylgir svona heimsviðburðum. Mads komast að því, sér til mikillar gleði á föstudagskvöld að hann komst enn í jakkafötin og það meða góðu móti og ég var búin að sannfæra Boggu um að hún gæti vel lánað mér eitthvað að vera í.

Kvöldið hófst svo með bolludrykkju heima hjá Birtu og Helgu - það var ljómandi gott. Síðan var haldið með rútu upp í Brautartungu í Lundarreykjadal.

Rútubílstjórinn okkar í ,,miðrútunni"

Þegar komið var á staðinn uppúr klukkan 19:40 var byrjað að berjast um borð en ekki var skipað í sæti af hálfu nefndarinnar að þessu sinni. Fólk lennti út um hvippin og hvappinn og ekki endilega með þeim sem ætlað var en sem betur fer urðu ekki úr því slagsmál eða neitt meiriháttar. Því næst var ætlunin að borðhald hæfist en vegna einhvers misskilnings varðandi eldunaraðstöðu á staðnum og seinkaði matnum nokkuð. Því varð að drepa tímann.

Veislustjórinn, Jón í Mófellstaðakoti (Jón í Mófó) talaði og söngFormaður skólafélagsins, Vignir, talaði

Maggi frá Stóru-Ásgeirsá söng svo ,,kremkex" með Bjarna Arnar sem bakrödd

Siggi frá Kúskerpi flutti svolítinn leikþátt ásamt Símoni þar sem eftirminnilega var hermt eftir hrút, byssuskoti og fleiru. Svo átti að sýna vidoin góðu sem tekin höfðu verið upp fyrir árshátiðina með ærnu veseni. En ekki var það til í að virka sem skildi, DVD spilarinn vildi ómögulega spila diskinn og allt í volli svo ekkert varð úr því í bili. En svo kom maturinn loksins klukkan 21: 30 allir voru að verða hungurmorða og pissfullir svo maturinn rann oní liðið á svipstundu.

Borðfélagar okkar Guffa og Bidda systir voru í gífurlegu stuði

Eftir matinn var svo komið að því að flytja restina af skemmtiatriðunum og stóð sú rest saman af Magga frá Ásgeirsá og videóunum sem ekki vildu spilast fyrr um kvöldið. Vesenið út af videóunum fór næstum út fyrir öll velsæmismörk en sem betur fer voru þau nægilega fyndin til að það borgaði sig.

Þetta er nú lélegt video sem slíkt en hljóðin eru það sem á að komast til skila.

Kvöldið endaði svo með brjáluðum dansi við undirleik Veðuguðanna.

Steingrímur gerði sér lítið fyrir og setti sig í sinn alkunna töffaragír

Sveinn snéri Elvu Dögg eins og enginn væri morgundagurinn
Silja, Eiríkur og María áttu hreinlega dansgólfið á tímabili enda um gríðarlega öflugt þríeyki að ræða

Einar afmælisdrengur (18. nóv) með nýja afmælissixpensarann

Mál er manna að þetta hafi þrátt fyrir allan seinagang og vesen verið gífurlega góð árshátíð og er ég hjartanlega sammála því enda átti ég þátt í skipulagningu hennar þó svo að skemmtanastjórinn, Birta, hafi að sjálfsögðu borið hitann, þungann og mest allar áhyggjurnar af þessu öllu saman.

Orð dagsins: Brennivínsæði Þýðir: geðtruflanir af völdum langvarandi áfengisneyslu (delerium tremes). Dæmi: Búast má við hrinu af brennivínsæði á Hvanneyri á næstu dögum eftir árshátíðarhelgina.

Sjaldséðir eru hvítir hrafnar...

2007-10-27T10:45:00.000Z

Komiði nú sæl.

Nú eru blessuð prófin búin og er það gott.

Það hefur nú lítið spennandi gerst síðan síðast... þó eitthvað þó það sé ekki endilega spennandi... Ég hef til dæmis afrekað að ná mynd af hrossinu nýkeypta, farið heim og skoðað ásteningslömb og í fyrrakvöld fór ég á karókíkvöld á barnum (en söng ekki).

Já einhver var að væla út meiri upplýsingar um Gand... Sökum míns gloppótta minnis man ég ekkert hvað faðir hans heitir en upplýsingarnar um móður hans eru þessar:

Glögg frá Gullberastöðum

Faðir: Sindri frá Kjarnholtum
Móðir: Lögg frá Krossi
FF.: Kolgrímur frá Kjarnholtum
MF.: Þokki frá Bóndhóli

Hér er fjallhesturinn verðandi í allri sinni dýrð. Með honum er móðir hans.

En já... um síðustu helgi skruppum við Mads svo heim í Arnarholt. Þar voru náttúrulega allir í banastuði að vanda, bæði menn og skepnur. Ásetningurinn var kominn á hús og leit bara ágætlega út.

Nýkeyptar ásetningsgimbrar úr Öræfum. Bletta og Sletta Blettsdætur.

Hundurinn Mosi var eins og venjulega....

Hesturinn minn bar að vanda af hinum í stóðinu.

En síðastliðinn fimmtudag var karókí á barnum. Gífurleg stemmning og ógurlega mikið af fólki.

Allir gerðu sig eins myndarlega og þeim frekast var unnt líkt og sjá má.

Dómnefnd kvöldsins skipuðu Alma, Hallur og Rebekka.

Sigga og Bogga voru fyrstar á dagskrá.

Mads með hvíta hrafninum sem þarna var staddur.

Jæja, nóg í bili.

Orð dagsins: Ve (HK)
Orðið þýðir: eymd, kveinan.
Dæmi: Upphófst mikið ve er þyngarstuðullinn var reiknaður. Mikið ve er þynnka.

Sennilega síðasta blogg fyrir próf

2007-10-08T14:25:00.000Z

Góðan dag.

Nú eru ritgerðirnar búnar og prófin næst á dagskrá. Mér fannst því rétt að skrifa hér nokkrar línur svo færi að ég ætti ekki afturkvæmt úr einhverju prófanna.

Ég gleymdi eiginlega að segja frá einni gríðarlega skemmtilegri sögu í síðustu færslu. Sögunni af því þegar ég týndi bifreið. Hér kemur hún:

Um daginn hugðist ég fara í Borgarnes sem er svo sem ekki í frásögurfærandi nema hvað ég fór á galantinum hennar Siggu systur. Galant þessi er sjálfskiptur og er ég ekki sérlega vön að aka þannig tækjum.
Ég var eitthvað að erinda og fór meðal annars í Húsasmiðjuna í Borgarnesi. Lagði fyrir utan og skaust inn og keypti það sem mig vanhagaði um. Ætlaði svo að skvera mér út í bíl en þá var bara einhver mannfíla að leggja í stæðið mitt og enginn galant.... Litaðist um og var þá ekki helvítið búið að renna niður brekkuna fyrir framan Húsasmiðjuna og staðnæmast í kanti þjóðvegar 1. Mér láðist að setja í PARK, falleg stund og notaleg. Ég fór og sótti tækið, sem engann skaða hlaut þrátt fyrir allt, og hélt áfram að reka erindi mín en setti í park á næsta bílastæði.

Skemmtilegt þegar eitthvað svona hendir mann....

En að öðru.
Síðasta fimmtudag var haldinn keppni í leðjubolta hér á Hvanneyri. Drullan var allsráðandi og stemmningin gífurleg.
Um kvöldið var svo grill úti í fjárhúsum þar sem ég tók þann pólinn í hæðina að hrynja í það. Það tókst með ágætum enda var ég steindauð heima í rúmi klukkan 00:30, búin að æla á 3 stöðum, gleyma gleraugunum á öðrum bæjum og týna treflinum mínum. Afbragð.
Daginn eftir heimti ég gleraugun og trefilinn og fór svo í próf í kynbótadómum hrossa frá 13:00-16:30, hressleikinn var allsráðandi.

Nú til að segja eitthvað skemmtilegt sem ég skammast mín ekki neitt fyrir þá keypti ég folald á laugardaginn. Hesturinn sem ég keypti síðast er nefnilega orðinn 16 vetra og því hyggilegt að finna eitthvað sem gæti komið í hans stað með tíð og tíma. Ég minntist á þetta við Birtu í haust og hún talaði við föður sinn sem síðan bauð mér brúnblesótt folald. Ég fór sem sagt á laugardaginn og skoðaði gripinn og keypti. Vonandi að þessi kaup séu jafn góð og þau sem ég gerði fyrir 16 árum...Tilraunir til að festa nýkeyptan reiðskjótann á filmu fóru fyrir ofan garð og neðan og því brá ég á það ráð að nýta paint til að koma útliti hans til skila.

Jæja nú ætla ég að fara út að viðra mig, svona áður en ég fer að læra...

Orð dagsins er: Gandur
Orðið þýðir: 1. Reiðskjóti, úlfur, háskaleg ófreskja. 2. göldrum magnaður reiðskjóti galdravættar, stafur - spástafur. 3. broddfjöður í skeifu. 4. bersvæði, berangur. Þeyta gandinn getur svo þýtt að: 1. fara hratt og víða. 2. tala ótt og mikið.
Dæmi: Aldís þeytir gandinn í gegnum símtækið. Kjölur er óttalegur gandur.
Til gamans má geta að ég hef nefnt nýkeypt folaldið Gand.

Sögur af landi

2007-10-02T20:46:00.000Z

Jæja komiði nú sæl

Langt orðið síðan eitthvað var skrifað hér af viti. Vonin til þess að hér sjáist nokkuð af viti er náttúrulega frekar veik í ljósi þess að ég er sjálf með fremur takmörkuðu viti. En það er annað mál.

Lítið hefur verið í gangi síðan síðast, mest megnis ritgerðaskrif og þessháttar skita með tilheyrandi pirringi og leiðindum. En nú sér brátt fyrir endann á því og við taka hin sívinsælu og bráskemmtilegu próf. Vííí ég get varla beðið.

En tökum upp léttara hjal.
Nokkuð hefur gengið á í skemmtanalífinu hérna á Hvanneyri tildæmis var á dögunum grill á vegum Grana. Þangað var ágætlega mætt og var almenn ölvun - sem er vissulega gott.

Formaður Grana brá ekki út af vananum við poolborðið og setti sig í allar hinar réttu stellingar

Steingrímur gleymdi sko ekki sjarmanum heima þetta kvöld...

Þetta var hin fínasta skemmtun og held ég bara að langflestir hafi verið sáttir við kvöldið þó svo að einhverjir hafi fundið fyrir ógleði daginn eftir...

Einhverntíma fékk Bogga þá flugu í höfuðið að gaman gæti verið að halda náttafatapartý á Árgarði. Þetta komst í framkvæmd á fimmtudaginn var og var hér mikið af fólki, lítið af fötum og töluverð ölvun á að minnsta kosti sumum.

Bændadeildardrengirnir sýndu hvað í þeim býr í náttfatapartýinu.

Rebekka og Snædís voru í banastuði

Silja sýndi sýnar bestu hliðar ...

Flestir partýgestir fóru svo á barinn er líða tók á kvöldið en komu aftur eftir lokun tvíelfdir og skemmtu sér fram eftir nóttu við drykkju og stóðlífi.
Morguninn eftir fór svo minn gríðarstóri bekkur (og Valþór) í skólaferð á norðurland þar sem við kynntum okkur ýmiskonar búskap og veðursældina í Húnavatnssýslum. Fólk var mishresst (hóstsiggahóst) til að byrja með en allir komust heilir heim.

Valþór og Birta virða fyrir sér kró í fjárhúsinu á Hjallalandi

Einnig var kíkt inn í eggjabúið á Efri-Mýrum í Refasveit... (Mynd ekki þaðan)

Steingrímur og norðlenskur ráðunautur kanna heygæðin á Hlíðarenda í Óslandshlíð.

Allir á Syðra-Skörðugili sýndu af sér mikla kæti og var þessi minkur engin undantekning

Þetta fer nú að verða gott í bili.

Orð dagsins: Gersta (so)
Orðið þýðir: styggja, ýfa, espa.
Dæmi: Lítið þarf til að gersta Helga. Aldur kvenanna gersti ekki ungu drengina.

Fátt er svo með öllu illt....

2007-09-19T12:27:00.000Z

Jæja... Sæl veriði

Langt síðan síðast og mikið að gera.
Það er reyndar allt of mikið að gera... ritgerðir, verkefni, verklegir tímar og einhver svona vitleysa sem ég hélt maður losnaði við á 3 ári í háskóla... en nei... greinilega ekki.

Skrópaði í skólanum í síðustu viku. Fór á fjall. Það var, tja, blautt, nema þegar snjóaði þá var kalt - semsagt einstaklega gaman.

Annars er bara ekkert að frétta sem mér þykir vert að segja frá að svo stöddu.

Orð dagsins: Trys
Orðið þýðir: verðlaus hlutur, glingur, drasl.
Dæmi: Mazdan hennar Birtu er nú hálfgert trys. Nýja hjólið hans Steingríms er sko ekkert trys.

Enn á ný hittumst við

2007-08-21T14:27:00.000Z

Sælir dyggu lesendur (ef þið eruð þá til).
Nú er netsamband orðið raunveruleiki þar sem ég er nú mætt til náms á Hvanneyri, þriðja haustið.
Það er kannski við hæfi að segja svona upp og ofan af sumrinu í tilefni þess að það er að renna sitt skeið og ég hef ekki deilt staf með umheiminum síðan í maí.

Sumarið var ágætt. Við Mads unnum saman við smíðar á Flúðum í Hrunamannahreppi þar sem okkar helsta verkefni var að klambra saman um 300 fermetrum af sólpöllum fyrir einn ríkan karl og kerlingu hans. Öðru hverju komumst við þó í önnur verkefni s.s. að koma upp kofa í Borgarfirðinum, nánar tiltekið á Skeljabrekku.

Í byrjun júlí brugðum við okkur með góðu gengi í svolitla hestaferð inn í Fremstaver og var það ljómandi gaman fyrir utan allt rykið sem á vegi okkar varð.

Svava hafði skíðagleraugu til varnar rykinu

Svo var fénu komið á fjall. Það voru nokkrir byrjunarörðugleikar en allt hafðist það þó að lokum.

Vaskir rekstrarmenn reka upp með Svartá skammt frá Árbúðum

í júlí vorum við aðallega að sóla okkur á sólpöllunum í vinnunni en undir lok mánaðarins fór Mads með mömmu, Sævari og bræðrum mínum til Borgundarhólms sem sérlegur túlkur og leiðsögumaður.

Mamma og Sævar kynna sér danskan kúabúskap hjá ekta dönskum kúabónda (í miðið)

Um verslunarmannahelgina skelltum við okkur svo í svolítinn bíltúr um Snæfellsnes og Borgarfjörð og eyddum kvöldunum á Árgarði í góðravina hópi.

Mads forðar sér frá hættum hafsins

Ekki man ég eftir neinu fleiru sérlega markverðu sem átti sér stað nema kannski því að blessuð tíkin okkar í Arnarholti, Glirna, andaðaist á heimili sínu í lok júní - blessuð sé minning hennar. Í hennar stað er nú kominn hundur að nafni Mosi. Sá er ættaður úr Lundarreykjadal nánar tiltekið frá Hóli og Lundi. Hann er enn dálítið vitlaus en vonir standa til að úr honum rætist.

Glirna blessunin meðan hún var enn hress og spræk

Nú er skólinn byrjaður. Heldur snemmt að mínu mati en allt verður víst að hefjast einhverntíma...

Gott í bili.

Orð dagsins er: Dosk
orðið þýðir: gauf, dund, slór, leti, hik eða deyfð.
Dæmi: Danir doska ekki við bjórdrykkju. Ragnhildur doskaði ekki við að ná í Daníel.

Heilabilun

2007-05-14T11:59:00.000Z

Ég velti fyrir mér hvað bærist í brjósti upphafsmanns prófa þegar hann sér börn og ungt fólk í blóma lífsins mygla yfir námsbókum á sólríkum vordögum.

Lærdómssetrið Hvanneyrargötu 2

Orð dagsins er: Heilaköst
Orðið þýðir : sérkennilegar hugdettur, órar
Dæmi: Próf eru heilaköst.

Maísól og margt fleira

2007-05-02T16:40:00.000Z

Jæja góðan dag og kærar þakkir fyrir afmæliskveðjurnar sem mér hafa borist hér á síðunni.

Nú er maí genginn í garð, nánar tiltekið annar dagur þess mánaðar sem þýðir að nú eru 8 ár síðan ég fermdist. Það er svo sem ekki merkilegt í sjálfu sér en mér þykir þó skemmtilegt að greina frá því að ég hef ekki farið í heila messu síðan þá enda bjóða þær yfirleitt ekki upp á annað en líkamlega og andlega þjáningu.

Síðasta vika hefur verið nokkuð óvegnjuleg. Ég fór nefnilega ásamt ástmanni mínum á heimaslóðir hans í danaveldi, nánar tiltekið Borgundarhólm.

Hér eru nokkrar myndir úr ferðalaginu....

Mads ásamt systur sinni þar sem eitt sinn stóð ungdómshúsið

Þessi strútur fann sig knúinn til að grobba sig lítið eitt.

Einn af mörgum blómstrandi repjuökrum á Borgundarhólmi

Ég ríð hinum merka brokkara Bobby

Jens, sem er svínabóndi, og Mads í svínahúsinu

Ég að mingla við Shire-stóðhest sem að sögn eigandans er um 1100 kg

Afi hans Mads (lengst til vinstri) og tveir vinir hans fara með gamanmál

Borgundarhlólmskur mjólkurbíll (mynd fyrir Axel)

Mads á sólarströnd í skítakulda

Nú er ég svo komin heim í íslenskt vor. Sauðburður hafinn, skaflajárnin orðin laflaus undir draganum úti í hesthúsi, verkefni sem þarf að klára farin að ógna manni og enn ein leiðinda prófatíð í uppsiglingu. Endalaus gleði.

Gleðin er reyndar heldur meiri hér á Hvanneyri núna en venjulega því í dag er sá dagur er þriðja árs nemar skila inn lokaverkefnum sínum. Það má því búast við að einhverjir fagni með einum eða fleiri bjórum núna þegar líður á kvöldið.

Pjakkur mun þó ekki detta í það í kvöld þar sem hann er bindindishestur

Orð dagsins er: Erður
Orðið þýðir: reður
Dæmi: Erður verður við stinningu stærri.

Fyrir páska

2007-04-04T14:23:00.000Z

Sæl veriði

Djöfull líður tíminn hratt... það er ekki nema smá stund síðan mars var rétt byrjaður og nú er apríl kominn. Ég er helvíti ánægð með að hann sé mættu blessaður apríllinn, styttist í vorið, sumarið og alla þá gleði sem því fylgir.

Ekki hefur neitt umtalsvert á daga mína drifið síðan síðast en helst ber að nefna að við Mads skelltum okkur í borg óttans á laugardaginn var. Þar skoðuðum við í helstu verslannir s.s. IKEA (sem er óskaplega stór búð) og Rúmfatalagerinn auk Bónuss og Hagkaupa. Við höfðum svo mælt okkur mót við vinkonur mínar úr ML þær Valgerði og Bergþóru og ástmenn þeirra Kristinn og Birki. Við hittumst á ágætum veitingastað í Smáralindinni, átum á okkur göt og ræddum mikilvæg málefni s.s. hvernig páskaegg ætti nú helst að versla þetta árið. Mikil krísa í gangi í þeim efnum.

Vala og Bergþóra eru afar duglegar að borða

Eftir óhóflega neyslu matar ultum við heim til Bergþóru og Kristins og góndum á þá merkis ræmu Hostel en hún þótti að sumra mati ákflega ógeðsleg. Seint og síðar meir renndum við heim á Hvanneyri en komum þar að læstum dyrunum. Ekki höfðum við neina lykla að húsinu meðferðis svo við brugðum á það ráð að guða á glugga Siggu systur. Hún rumskaði eftir nokkur öflug bönk og tuldraði að hún skildi koma (allavega heyrðist okkur það). En hún kom ekkert svo ég hringdi í hana. Hún skammaði mig um stund fyrir að hafa ekki lykla og kom svo til dyra og sýndi ekki af sér neina kæti – undarlegt.

Sigga systir glöð í bragði enda ekki ný vöknuð

Annars hefur bara verið frekar rólegt hér, skóli, hesthús og leti eins og gengur. Reyndar var þrekvirki unnið á mánudaginn, tryppið hennar ömmu var járnað. Ég fékk Helgu Maríu í lið með mér til að vinna verkið og tókst það á endanum þrátt fyrir að bæði tryppið og Helga María hafi verið ansi nærri því á köflum að missa stjórn á sér.

Tryppið hennar ömmu, Glóa, sýnir af sér kæti í hesthúsinu

Stefnan er svo sett á að fara heim í Arnarholt í kvöld. Páskunum á nefnilega að eyða í að sinna rollunum. Þær þarf að sprauta, brennimerkja og vigta.

Gleðilega páska

Orð dagsins: Vamla
Orðið þýðir: 1. að skreiðast eða þvælast og 2. að umla eða tauta.
Dæmi: Margur hefur vamlað heim af Kollubar við illan leik. Silja vamlar um hvaðeina.

Gefin loforð

2007-03-27T22:18:00.000Z

Ég held að ég hafi lofað einhverjum að blogga um atburði síðustu daga. Man samt ekki alveg hver það var en það er líklega aukaatriði.

Sem sagt. Á föstudaginn héldu þær Guðfinna og Svana upp á 25 ára afmælin sín á Kollubar. Við íbúarnir á Árgarði mættum saman og gáfum saman glæsilegar gjafir, bleika kórónu, bleika buddu með áletruninni ,,princess” og bleikt armband í stíl við alltsaman. Þarna var slatti af fólki bæði frá Hvanneyri og svo fólk sem afmælisbörnin buðu en það er frá einhverjum öðrum stöðum. Bjór var í boði fríkeypis framan af og var það gott. Ástmaður minn gerðist þreyttur er fór að síga í ellefu og fór þá heim en ég skemmti mér fram undir þrjú og slangraði svo heimleiðis.

Guðfinna afmælisprinsessa skammtar ölið

Svana afmælisprinsessa í afar góðum gír

Sigga og Sigurborg bregða á leik

Allir helstu menn voru mættir, þar á meðal, Vignir, Þórhallur á Grímarsstöðum, Sigurður Þór, Unnsteinn og glittir í Steingrím

Laugardagurinn var áfallalítill. Skroppið var á opinn dag á Hesti en þar var margt að skoða og ekki síst að safna. Það var nefnilega fullt af áhugaverðum bæklingum um allt milli himins og jarðar auk úrvals fallegra derhúfa og skriffæra merkta hinum ýmsu fyrirtækjum.

Áburðarverksmiðjukonan í fantastuði í stíunni sinni

Kerlingarnar hérna á Árgarði, Sigga, Silja og Aldís, smelltu sér svo á ball á Venus á laugardagskvöldið ásamt Perlu og Boggu og gat ég ekki annað séð á þeim á sunnudag en að þær hefðu haft góða skemmtun.

Í gær og dag kom veðrið Hvanneyringum heldur betur á óvart... Það var hvorki rok né rigning! Og það sem meira var, það var sólskin og frostlaust – ótrúlegt.

Orð dagsins er: Dyrgja
Orðið þýðir: 1. dvergvaxin kona. 2. Digur, durgsleg kona.
Dæmi: Sumir menn eru kynósa af dyrgjum. Dyrgjur eru sjaldséðar í Borgarfirði.

Mánuðurinn mars.

2007-03-17T11:28:00.000Z

Jæja þá er kominn mars. Loksins...

Alltaf nóg að gera. Prófatörn nýlega lokið og er það gott enda voru prófin að þessu sinni í frekar leiðinlegum fögum; hagfræði og plöntulífeðlisfræði. Nú eru fögin lítið eitt áhugaverðari og manni flýgur jafnvel í hug að maður geti haft not af þeim í framtíðinni... Ekki er þó óhætt að fullyrða um það.

Nokkrir gleðilegir hlutir hafa átt sér stað undanfarið.

Til dæmis var próflokum fagnað með nokkrum krökkum með því að fara í sundferð, á töltkeppni og í heimsókn á helstu bæi í nærsveitunum. Það var að mörgu leyti ákaflega skemmtilegt.

Um síðustu helgi héldum við ástmaður minn svo á mínar heimaslóðir til að sæka tvö stykki hross. Þau eru nú komin í Borgarfjörðinn heilu og höldnu og veita mér tilefni til að gera eitthvað annað en að læra svo sem eins og einu sinni á dag.

Gæðingurinn Pjakkur

Í fyrrakvöld var svo loksins fjárhúsgrill eftir langt hlé. Þangað mætti slatti af fólki og grillaði sér hvaðeina sem hugurinn girntist og dreypti á ýmiskonar veigum. Þegar leið á kvöldið var haldið á barinn og svolítið meira drukkið, sungið og trallað. Ég skemmti mér konunglega og til allarar hamingju var ég nánast ekkert ,,lasin” daginn eftir.

Suma lætur maður bara ekki bendla sig við....

Minningu Sigga Frigg haldið á lofti.

Orð dagsins er: Kynósa
En það þýðir: að vera gegnsýrður af kynlífshugsunum og -atferli.
Dæmi: Drengurinn sannaði það á dögunum að hann er gjörsamlega kynósa

Af frægum og fallegum

2007-02-24T18:21:00.000Z

Sælt verið fólkið

Í gærkvöldi var grímuball á Indriðastöðum. Þar var gríðarleg stemning en athygli vakti að þar var stórstjarnan Britney Spears sem mikið hefur verið í fréttum undanfarið. Britney var á ferð með hel-mössuðum lífverði sínum Vöðva-Valla sem varði hana fyrir öllu óæskilegu áreiti skítugra sveitamanna.

Þessar myndir eru sláandi líkar og leikur grunur á að önnur sé fölsuð. Talið er þó að sú vinstramegin sé af hinni réttu Britney þar sem bakgrunnurinn þeim megin er mun meira sannfærandi.

En Britney var ekki það eina merkilega á svæðinu. Þarna voru líka tvö pör af tvíförum þeir Unnsteinn og Unnsteinn og Óðinn og Óðinn.

Hér sjást tvífarapörin tvö, Unnsteinn og Unnsteinn og Óðinn og Óðinn. Hinir raunverulega Unnsteinn og Óðinn eru staðsettir lengst til vinstri og lengst til hægri.

Annars fór ballið gríðarlega vel fram og voru margskonar sniðugir búningar til staðar s.s. kýr, kúrekar, mexíkanar, þernur, zorro og ýmislegt fleira.
Dans var iðkaður af miklum krafti og var margt glæsilegt sporið stigið við þau skelfilega slöppu lög sem Dj. Binni hristi framm úr erminni.

Fá pör á dansgólfinu sýndu eins mikla innlifun og Magnús (úr tvíeykinu Magnús & Eyjólfur) og Júdó-Eiki. En hér sést ákveðnin og innleikinn skína úr augum þeirra.

Svo virðist sem flestir hafi komist heilir heim og enginn dáið nema til skamms tíma.

Færi ég UMSK II (umhverfisskipulag II) mínar bestu þakkir fyrir þessa ágætu skemmtun (nema rispuðu og lélegu diskana hans Dj. Binna) og einnig þeim sem ég hafði félagsskap af þarna um kvöldið.

Orð dagsins: Dyfringsháttur
Orðið þýðir: sljóleiki
Dæmi: Ofdrykkjumaðurinn sýndi töluverðan dyfringshátt eftir að hafa kastað upp í tíunda sinn.

Rjómablíða

2007-02-22T13:22:00.000Z

Góðan dag

Að vanda hef ég verið heldur löt við að skrifa hér.

Heilsuleysi hefur gert vart við sig á mínu heimili hér á Hvanneyri. Við Mads, og fleiri reyndar, höfum þjáðst af kvefi með hósta, hori og slappleika síðustu vikurnar – unaðslegt. Þetta er reyndar allt að skána og eru flestir að mestu leyti risnir úr rekkju og snúnir til fyrri starfa.

Annars er nú mest lítið að frétta og slúðrið í lágmarki en vonir standa til að eitthvað gerist krassandi á grímuballi sem halda skal á Indriðastöðum annað kvöld. En talandi um grímuball þá var einmitt öskudagur í gær og lögðu nokkrir sönglandi sníkjupúkar leið sína á Árgarð. Tveir þeirra voru reyndar með eldra móti en áhuginn fyrir athygli var síst minni en hjá þeim sem yngri voru.

Ég fór út áðan til að eiga stund með bílnum mínum, Daihatsu Rocky, sem þið þekkið nú líklega mörg. Þar rakst ég á fyrsta skráningarskírteinið hans og er það frekar fróðleg lesning. Þar stendur nefnilega; Notkun: Torfærubifreið.

Orð dagsins: að svarfla
Það þýðir 1: rugla, færa úr lagi, kollvarpa, eyða. 2: ræna, fara ránshendi um.
Dæmi: 1: Silja svarflaði hárgreiðsluna er hún barði hausnum við steininn. 2: Meydómi er gjarnan svarflað af óprúttnum mönnum.

Æsispenna

2007-02-01T21:13:00.000Z

Það er fimmtudagskvöld!

Framlengingin á leik Dana og Pólverja stendur yfir. Mads er svo spenntur að hann fór á dolluna til að létta á...

Það er bara ekki öðruvísi.

Orð dagsins er: Sestína
Það er: Órímaður bragháttur frá 12. öld, nær óþekktur á Íslandi, sex erindi með með sex braglínum í hverju nema þrjár í lokaerindi og fimm stígandi bragliðir í hverri línu.
Dæmi: Bernharður orti sestínur til heilla dömurnar.

Athafnasemi

2007-01-24T22:14:00.000Z

Nú er nokkuð liðið frá síðasta pistli og hefur nokkuð á mína daga drifið síðan síðast.

Skólinn fór af stað með rólegheitum og fög annarinnar hafa enn ekki komið mér á óvart með yfirdrifnum skemmtilegheitum. Lítið er að frétta nema þó það að vikan 14. til 21. janúar var afar annasöm og hyggst ég segja hér lítið eitt frá helstu viðburðum.

Þegar vikan hófst var ég önnum kafin við að prjóna gríðar mikla lopapeysu á hávaxnasta bekkjarfélaga minn Axel Kárason og var ég í því verki þann tíma sem ég hefði líklega verið í að tala við ástmann minn, en hann var ekki heima þessa vikuna.

Mánudag fór ég ásamt fögru fylgdarliði í Borgarnes til að versla ýmsar nauðsynjar á borð við bjór, skrúfur og efni í kjötsúpu.

Þriðjudag fór ég svo aftur í Borgarnes ásamt öðrum flokki fagurs fylgdarliðs og í þetta sinnið var versluð nauðsynjavara á borð við áfengi og afmælisgjöf en mér hafði verið boðið í afmæli á miðvikudeginum.

Miðvikudagurinn 17. janúar rann svo upp. Þegar líða tók að kveldi hélt ég í afmælisboð hjá Helgu Maríu en þetta kvöld fagnaði hún 23 afmælisdegi sínum með því að bjóða í kjötsúpu.

Fimmtudagskvöld var svo gleðskapur á Árgarði en íbúar neyttu þá þess áfengis sem keypt var fyrir dósapeninga. Sú gleði barst síðan um stund á Kollubar þar sem fótabúnaður minn vakti athygli – brún Viking gúmmístígvél, en svo var farið að nýju á Árgarð og drykkju haldið áfram.

Föstudagurinn var rólegur framanaf en svo þegar líða tók á daginn var hafinn undirbúningur fyrir herlegheit helgarinnar – ferð Hrútavinafélagsins Hreðjars í Skaftártungur. Ég hafði lofað að keyra þann eðla vagn Mözdu að Sandlæk í Gnúpverjahreppi á föstudeginum og hafa innanborðs Þorrablótsfara fjóra þau Birtu, Valþór, Helgu og Einar. Þetta gerði ég og tókst ferðin vonum framar og veit ég ekki betur en Þorrablótið hafi verið hin besta skemmtun.

Árla laugardagsmorguns reif ég mig á fætur og ók að Sandlæk til að hitta væntanlega bílfélaga í Hreðjarsferð (Helga Hauk, Guffu, Helgu og Birtu). Eftir staðgóðan morgunverð var liðinu og draslinu pakkað í Subaru-bifreið Helga Hauks og haldið af stað á Hvolló (Hvolsvöll) en þar hittist sá ágæti hópur sem í ferðina fór.

Myndir munu nú tala að mestu leyti sínu máli:

Heiða á Ljótarstöðum býður gestum Smirnoff

Helgi, Eyjólfur og Bjarni taka á fé Snæbýlisbóndans

Fjárhúsin á Borgarfelli voru spáný

Heiða í Úthlíð býr svo vel að hafa koníaksstofu í sínum fjárhúsum

Um kvöldið fengum við svo afbragðs hangikjöt í félagsheimilinu Tunguseli en þar gistum við svo um nóttina. Um hádegi á sunnudag var svo haldið á Kirkjubæjarklaustur og þeir sem list höfðu fengu sér eitthvað að snæða í sjoppunni á staðnum. Þá var tekið að fylgja sunnudagsdagskránni og munu myndir enn tala:

Eyjólfur (stór) og Steingrímur (smærri) í fjárhúsunum á Kirkjubæjarklaustri

Guðfinna mundar myndavél og Óðinn rannsakar gjafagrindur í fjárhúsunum í Fagradal

Á leiðinni að sandlæk komum við svo við hjá Báru fyrrum bekkjasystur þriðja árs í búvísindum. Þar fékk Helga María þessar glæsilegu reiðbuxur sem hún spókaði sig svo í fram eftir kvöldi.

Leikið við linsuna á nýjum reiðbuxum.

Þegar öllu þessu var lokið snæddum við svo á Sandlæk og fengum örlitla leiðsögn um fjárstofn Helga Hauks. Síðan var sest upp í Mözdu og ekið á Hvanneyri.

Orð dagsins er úrinn
Úrinn þýðir; 1. Votur, rakur 2. Úrillur, skapstyggur

Dæmi: 1.Snorri var úrinn eftir hann féll í pollinn. 2. Sigríður er úrin í morgunsárið.

Jólaannáll.

2007-01-05T12:53:00.000Z

Jæja nú eru jólin alveg að verða búin og nýtt ár komið ágætlega af stað. Til hamingju með það.

Eftir stranga prófatörn í desember komst ég loks í jólafrí. Með fyrstu verkum var að þrífa svolítið til á Árgarði og tók ég að mér þvottahúsið, geymsluna og forstofuna. Þar var skúrað og skrúbbað og allt varð gott að lokum. Þegar öllu þessu var lokið hélt ég heim á leið á drossíunni minni með viðkomu í höfuðstaðnum. Þar skilaði ég af mér einni jólagjöf og keypti svo jólagjöf handa ástmanni mínum; stjórnbúnað á hest. Svo ók ég eina leiðinlegustu leið á Íslandi, Hellisheiði, á Selfoss. Þar skilaði ég af mér annarri jólagjöf og ók svo eins og druslan dró upp að Brúarhlöðum en þar voru gríðarlegir vatnavextir sem mig fýsti að sjá.

Brúin yfir Hvítá við Brúarhlöð í vatnavöxtunum. Venjulega eru nokkrir metrar niður í vatnsborðið

Jólafríið var svo alveg hreint ágætt. Ég eyddi tímanum í að pússa sófaborðið okkar og fleira uppbyggjandi s.s. að gefa rollunum og aðstoða mína sælu móður við heimilsstörfin. Jólagjafirnar voru gríðar margar þetta árið, enda bæði foreldrar mínir og tengdaforeldrar fráskildir. Sem dæmi um jólagjafir vil ég nefna;

Sokka frá ömmu og afa
Prjóna, helklunálar og fleira í þeim dúr frá mömmu og Sæsa
Teymingargjörð og hitamæli (ekki rassa) frá Mads
Hjartalaga sílikonkökuform frá móðursystur hans Mads
Þæfða veggmynd af bílnum mínum frá Bjarna bróður
Hleðsluborvél frá Húsum og stigum

Saman fengum við Mads svo ýmsa hluti;
Gjafabréf í ýmsar búðir frá Svani bróður pabba
Skálasett frá Eiríki bróður mömmu
Hraðsuðuketil og vaggandi jólafólk frá Afa og Ásu

Og margt fleira.

Sem sagt gríðarlegt gjafaflóð og mikil gleði og hamingja.

Skallinn á mér og smettið á Mads í banajólastuði á aðfangadagskvöld

Áramótin voru róleg að vanda, lítið um sprengingar og áfengisdrykkju.

Mads fór svo aftur að Hvanneyri á nýársdag enda þurfti maðurinn að mæta í vinnu 2. jan.
Ég kom svo að Hvanneyri í gær og vann það þrekvirki að aka ein og óstudd í bóksölu stúdenta og versla þar eina bók, skrúfblýant og möppu. Takk fyrir takk.

Nú er ég hinsvegar að hugsa um að baka hjónabandssælu í hjartaforminu mínu.

Orð dagsins sögnin; að fjolla
En það er gamalt mál og þýðir; daður eða lauslegt ástarsamband.
Dæmi: Helgi fjollaði við Helgu meðan þau snæddu ostrur. Smári og Einar fjolluðu saman um tíma

Prufung mit Sahne

2006-12-12T11:25:00.000Z

Já góðan daginn góðir hálsar

Nú sit ég hér fyrir framan skjáinn og drekk kaffi því ég nenni ekki að byrja að lesa jarðvegsfræði. Prófatíminn er nefnilega hafinn með allri sinni gleði. Í morgun var æsispennandi tilraunafræðipróf og framundan er svo jarðvegsfræðin. Þegar henni verður allri lokið er það svo bara blessuð dýrafræði hryggleysingja sem rekur lestina. Gleði gleði.

Þrátt fyrir þau leiðindi sem fylgja prófunum hafa leiðindin sem fylgja vali og kaupum á jólagjöfum verið leyst. Við ástmaður minn fórum nefnilega í höfuðstaðinn á föstudaginn og leystum málið á um það bil 4 klukkustundum. Mettími að mínu mati og þá sérstaklega í ljósi þess að ekki var búið að ákveða nærri allt fyrirfram. Annað stórmerkilegt er að við erum búin að senda jólaakkana sem fara eiga til Danaveldis af stað til síns heima og það áður enn fresturinn fyrir ,,pakka til Evrópu fyrir jól" rennur út (það er í dag reyndar og þeir voru sendir í gær).
Og þetta er ekki allur dugnaðurinn. Á laugardaginn tóku við okkur til og þrifum hátt og lágt í íbúðinni en það höfðum við ekki gert svona í einni skorpu áður. Ég þreif meira að segja ofninn sem ekki hafði verið þveginn síðan einhverntíma (ég hafði allavega aldrei þrifið hann). Þá komst ég að því að glugginn sem maður horfir í gegnum inn í ofninn er ekki gulbrúnn í raun, hann er glær - gaman að komast að svona.

Jæja spurning um að hella sér í lestur Bændablaðsins.

Orð dagsins er grómur.
En það þýðir: 1 Óhreinn, 2 tilgerðarlegur eða 3 nákvæmur.
Dæmi: 1. Axel var grómur um munnin eftir að hafa skóflað í sig beikonvafinni önd.
2. Guðni var afar grómur er hann heilsaði Dorrit Mússajeff.
3. Þekjumat vallarfoxgrass var afar grómt enda framkvæmt af Ríkharð Brynjólfssyni.

Spáný staðsetning

2006-12-04T15:52:00.000Z

Takk takk ég tek hamingjuóskum ykkar varðandi nýju staðsetninguna með þökkum.

Það ber helst að nefna að ég er búin að setja upp báðar jólaseríurnar mínar og raða öllu jólaskrautinu (sem samanstendur af fimm hlutum) okkar Mads á fallega staði - semsagt rífandi jólastemning að Hvanneyrargötu 2.

Ástmaður minn varð sér út um helming af belju í sumar og var þessum kostagrip slátrað á fimmtudaginn. Helgin fór því í kjötskurð, hökkun og svo ritgerðaskrif um skötuorma.

Í tilefni nýju staðsetningarinnar ætla ég að koma upp föstum lið þegar því verður komið við. Það er orð dagsins. Í lok hverrar færslu verður eitthvað orð sem ég finn í nýjustu útgáfu íslenskrar orðabókar útskýrt og jafnvel nefnd dæmi um hvernig nota má það í daglegu máli.

Orð dagsins
Sálifa
orðið þýðir munnvatn á fornu ellegar úreltu máli
dæmi um notkun: Eftir að Einar var sofnaður lak út úr honum sálifa niður á svæfilinn.